DILI, 22 Juñu 2026 (TATOLI)—Governu liuhusi Sekretáriu Estadu Asuntu Veteranus, Cesár dos da Silva ‘Merak’ husu ba povu sira atu forma iha dalan-ninin simu kadaver Saudozo Antigu Prezidente Repúblika no Atuál Prezidente Partidu FRETILIN, Francisco Guterres ‘Lú Olo’ bainhira to’o iha Aeroportu Internasionál Prezidente Nicolau Lobato, Komoro.
Delegasaun família inklui kadaver Lú Olo sei to’o iha Aeroportu Komoro, iha loron 23 Juñu 2026, iha tuku 06:00 dadeer. Aleinde ne’e sei entrega husi Ospitál Prince Court-Malázia bá família, no família kontinua entrega ba Estadu liuhusi FALINTIL- Forsa Defesa Timor-Leste (F-FDTL) hodi fó Guarda de Honra ba Saudozu.
“Husu ba komunidade, ita-nia estudante sira no funsionáriu públiku atu forma iha dalan simu ita-nia Eis Prezidente Repúblika, Francisco Guterres Lú Olo nia kadaver bainhira to’o iha Aeroportu Internasionál Nicolau Lobato aban,” Merak hateten ba Jornalista sira iha Saudozu nia Rezidénsia iha Farol, Segunda ne’e.
Notisia relevante : Autoridade no família prefere kadáver Antigu PR Lú Olo vizita ikus bá povu Ossú
Nia dehan, rute atu simu kadaver Saudozo Lú Olo hahú husi Aeroportu Komoro to’o Saudozo nia Rezidénsia Farol.
“Husu ba funsionáriu tomak, estudante, sidadaun, públiku, entidade sira hotu atu hambriik iha estrada ninian hodi halo resesaun ka simu ita-nia Eis Prezidente Repúblika hahú husi Aeroportu to’o nia Rezidénsia Farol hafoin ne’e mak idakidak fila bá halo nia serbisu,” nia hato’o.
Merak klarifika, Loron Nasionál ne’ebé Governu hasai hahú husi loron 22-28 Juñu 2026 ne’e apenas Lutu Nasionál maibé atividade hotu la’o normál.
Governante ne’e dehan, sei koordena ho PNTL atu fó seguransa ba resesaun simu kadaver Saudozo LuLlo nian hahú husi Aeroportu to’o nia Rezidénsia Farol.
Jornalista : Natalino Costa
Editora : Julia Chatarina
