VIKEKE, 22 Juñu 2026 (TATOLI)—Autoridade Postu Administrativu Ossú no família husi Antigu Prezidente Repúblika (PR), Francisco Guterres “Lú Olo”, prefere saudozu nia kadáver vizita ikus bá povu Postu Ossú.
Administradór Postu Administradór Ossú, José da Silva Amaral ‘Radekiu’, hateten ohin autoridade Ossú koordena ona ho parte família husi saudozu nian ne’ebé hela iha Ossú, maibé família sira mós sei dúvida tanba sei hein dezisaun husi saudozu nia espoza rasik ne’ebé agora daudauk sei iha Kuala Lumpur, Malázia.
Notísia relevante: Riak Leman: “Lú Olo nia falesimentu soke ha’u”
“Klaru katak ita-nia saudozu ne’e sei haloot iha Jardín Eroi Metinaru, Dili, maibé ami rona dehan mai vizita tiha Ossú mak bá fali. Nune’e, agora família sira dehan ba ha’u sei hein hela dezisaun husi saudozu nian espoza. Karik aseita, entaun mai Ossú maibé la aseita entaun la mai. Tan ne’e, aban mak foin husi nasaun Malázia mai Timor. Depoiz to’o tiha Timor mak foin ita rona loos,” José da Silva Amaral ‘Radekiu’ ba TATOLI iha Postu Ossú, Segunda ne’e.
Nia dehan, se saudozu nia espoza mak deside mai vizita ikus iha Postu Ossú, nu’udár autoridade postu prontu organiza maluk veteranu sira hodi prepara fatin ba saudozu.
Autoridade Postu Ossú ne’e sente triste lakon ema rezisténsia no líder ba nasaun Timor-Leste nian, maibé saudozu mós nu’udár ema Postu Ossú nia oan ida.
Iha fatin hanesan, reprezentante família husi antigu PR Lú Olo, Celestino Guterres, haktuir sei haloot saudozu Eis Prezidente Repúblika iha Jardín Eroi Metinaru, maibé família sira Ossú hakarak vizita ikusmai Ossú hafoin fila bá haloot iha Metinaru.
“Tan ne’e, ohin ami família sira halo koordenasaun ho protokolu nasionál inklui konsulta partidu no autoridade seguransa sira, atu saudozu nia kadáver ne’e mai vizita ikus iha Ossú,” nia tenik.
Nia dehan, daudaun ne’e Autoridade Ossú no Komandante Polísia Nasionál Timor-Leste (PNTL) Munisípiu Vikeke, Superintendente Xefe Polísia Euclides Belo túr hamutuk ho família sira iha Ossú hodi koordena hamutuk.
“Agora daudaun ita-nia Komandante PNTL Munisípiu Vikeke no Administradór Postu Ossú mai hamutuk ho ami família sira hodi ami konsulta malu. Se mai Ossu ami família no autoridade sira sei halo preparasaun atu simu ita-nia saudozu iha nian rezidénsia,” nia informa.
Entretantu, Antigu Prezidente Parlamentu Nasionál, Francisco Guterres “Lú Olo” ramata jornada moris iha loron Domingu (21/06) iha Ospitál Prince Court, Kuala Lumpur, Malázia.
Jornalista: Vitorino Lopes da Costa
Editór: Xisto Freitas da Piedade
