DILI, 22 Juñu 2026 (TATOLI)—Prezidente Konsellu Administrasaun Institutu Nasionál Kombatente Libertasaun Nasionál (CCLN-sigla portugeza), Vidal de Jesus “Riak Leman, sente soke bainhira rona Saudozu Francisco Guterres “Lú-Olo” nia falesimentu.
“Ha’u-nia sentimentu triste tanba ita lakon ita-nia maun-boot, ita lakon ita-nia líder nasionál no figura Timor-Leste nian. Nia kontaktu beibeik ha’u, hodi husu kona-ba atividade veteranu nian. Derepente ha’u rona horikalan nia hakotu-iis. Ida-ne’e soke boot ida mai ha’u no mós maluk veteranu,” Riak Leman dehan ba TATOLI via telefónika, Segunda ne’e.
Nia dehan Saudozu Lú Olo, ema ne’ebé matenek, brani no kontribuisaun ba rai ida-ne’e, la haree ba partidu.
Notísia relevante: Governu ‘charter’ Aero Dili translada kadaver Antigu Prezidente Lú Olo mai Dili
“Ami sira-ne’e, uluk iha ai-laran moris no terus hamutuk iha-ne’ebá. Iha ai-laran ne’ebá ami nunka fahe malu maski partidu ketaketak. Atu dehan nia (Saudozu) mate ne’e hanesan lakon ema lideransa di’ak ida ba rai ida-ne’e,” Riak Leman haktuir.
“Saudozu nia kontribuisaun iha funu laran ne’e, ami hamutuk iha Rejiaun III. Ha’u, Komandante Sabika, Lú Olo, Samba Sembilan ne’e mak hamutuk iha Rejiaun III. Saudozu nia kontribuisaun mós ba rai ida-ne’e maka’as tebes to’o ukun rasik an nafatin kontribui ba dezenvolvimentu Timor-Leste nian ho ideia no matenek,” nia hatutan.
Biban ne’e, veteranu ne’e husu ba família no nasaun no povu ida-ne’e, katak istória ne’ebé nia (Lú Olo) halo sei la lakon iha ema hotu-hotu nia memória.
Jornalista: Osória Marques
Editór: Xisto Freitas da Piedade
