DILI, 22 janeiru 2022 (TATOLI)—Komandu PNTL Munisípiu Dili konsege detein estudante na’in-55 tanba uza atributu Grupu Arte Marsiál (GAM) hanesan Persaudaraan Setia Hati Terate (PSHT), Ikatan Kera Sakti (IKS) no Grupu Arte Rituál (GAR) 77 hodi provoka malu, hafoin rona rezultadu ezame nasionál.
“Ohin, Ita bolu estudante hamutuk 55 mai eskuadra polísia hodi halo identifikasaun tanba sira uza atributu Grupu Arte Marsiál (GAM) no Grupu Arte Rituál (GAR) provoka malu durante komboiu (pawai), hafoin rona sira nia rezultadu ezame nasionál iha sira nian nia eskola,” Komandante PNTL Munisípiu Dili, Superintendente Xefe Henrique da Costa, informa ba Agência TATOLI, via rede sosiál, sábadu ne’e.
PNTL detein estudante hirak ne’e tanba viola lei númeru 5/2017, lei kona-ba arma branka; bandu ema uza sasan kro’at no uza atributu arte marsiál no arte rituál.
“Tanba ne’e mak liuhosi operasaun ne’ebé maka halo hosi ita nia polísia, konsege identifika estudante sira ne’e hodi halo apreensaun ba atributu ne’ebé uza hodi provoka malu, no ami halo investigasaun, aprezenta ona ba Ministériu Públiku,” Komandante ne’e akresenta
Komandu Munisípiu Dili halo apreensaun motor rua iha área Don Aleixo, 43 iha Kristu Rei no 10 iha Vera Kruz, bainhira estudante sira hala’o karavana (pawai) depois rona rezultadu ezame nasionál.
“Ami halo apreensaun ba motorizada hamutuk 29 tanba la uza kapasete, uza kanu-resin. Ami entrega ona ba iha tránzitu munisípiu Dili atu prosesa hodi aplika multa ba sira”, nia afirma.
Entretantu, iha Sábadu (22/1) ne’e, estudante territóriu nasionál simu nian rezultadu ezame nasionál iha idaidak nia eskola, hafoin iha loron hirak liu ba Ministeriu Edukasaun Juventude no Desportu (MEJD), anúnsia ofisiálmente rezultadu ezame nasionál 2021.
Notísia relevante: Estudante 50.752 aprovadu ezame nasionál no 18 la pasa
Jornalista: Natalino Costa
Editór : Florencio Miranda Ximenes
