VIQUEQUE, 23 fevereiru 2022 (TATOLI)—Komandante Polísia Nasionál Timor-Leste (PNTL) munisípiu Viqueque, Superentendente Polísia Sebastião Alves Quintão, apela ba líder arte marsiál sira hodi kontribui seguransa ba Kampaña Prezidensiál iha munisípiu Viqueque, hahú loron 02 marsu, durante semana rua.
“Iha tinan ne’e, tama festa demokrasia hodi hili Prezidente Repúblika (PR) foun ba períodu 2022 to’o 2027. Tanba ne’e, ema hotu presiza mai ho konsiénsia, liuliu líder arte marsiál sira mós iha obrigasaun hodi kontribui asegura situasaun seguransa iha munisípiu Viqueque,” Komandante PNTL hateten ba Agência TATOLI, iha salaun administrasaun munisipál, kuarta ne’e.
Notísia relevante: CNE Viqueque realiza paktu eleisaun pasífiku
Nune’e, nia otimista sidadaun hotu fó apoiu hodi kontribui ba festa demokrasia hodi la’o ho hakmatek.
“Ha’u fiar katak iha Eleisaun Prezidensiál 2022 ne’e munisípiu Viqueque sei sai munisípiu ezemplar ba munisípiu seluk no sei hatudu ba munisípiu seluk katak rejiaun ne’e hakarak dame,” nia otimista.
Biban ne’e, PNTL bandu sidadaun sira labele utiliza motorizada ho kanu-resin hodi halo barullu iha fatin públiku no tempu kampaña nian.
Jornalista : Vitorino Lopes da Costa
Editora : Julia Chatarina
