BAUCAU, 23 fevereiru 2022 (TATOLI) – Sentru saúde lima hosi tótal sentru saúde sia (9) iha munisípiu Baucau to’o oras ne’e seidauk atinje tarjetu kampaña vasinasaun AstraZeneca.
Sentru saúde lima mak hanesan sentru saúde Baguia no Uailili seidauk to’o pursentu 70, enkuantu sentru saúde tolu seluk seidauk atinje pursentu 85 tuir tarjetu nasionál hanesan Laga, Quelicai no Venilale.
Xefe Departamentu Jestaun Programa Saúde Baucau, Cristiano Cipriano Belo, husu atu responsável sentru saúde lima rerfere atu esforsu-aan finaliza lalais vasinasaun AstraZeneca tuir tarjetu nasinál fó katak tenke atinje pursentu 85.
“Hein katak kontribuisaun no sei integra hamutuk dala-ida de’it ho implementasaun Pfizer, importante mak komunidade hotu-hotu tenke vasina,” Xefe departamentu jestaun programa saúde Baucau hateten iha Vila Antiga, kuarta ne’e.
Cristiano husu ba sentru saúde haat hanesan Ria-mare, Bucoli, Vemase no Ossoqueli atu kontinua halo atendimentu vasina ba komunidade sira-ne’ebé seidauk vasina no husu kompleta doze daruak ba komunidade sira.
Totál komunidade ne’ebé partisipa iha vasina Astrazeneca hamutuk pursentu 84 korresponde ho na’in-61.961 hosi tótal alvu hamutuk na’in-73.317.
Sentru saúde Uailili foin atinji 69% hosi tótal tarjeitu 9.479, Baguai pursentu 67 hosi tótal alvu 8.067, Laga tótal alvu 11.160 foin atinji pursentu 76, Quelicai pursentu 87 hosi alvu hamutuk 10.410, Venilale tótal alvu hamutuk 9.924 foin atinje pursentu 81.
Nune’e mós sentru saúde Bucoli tótal alvu 2.804 atinjimentu pursentu 107, sentru saúde Vemase pursentu 98 hosi tótal alvu 3.234, Ria-mate tótal alvu 15.895 atinjimentu pursentu 99, Ossoqueli atinjimentu pursentu 106 hosi tótal alvu 2.347.
Jornalista : Natalino Belo
Editór : Evaristo Soares Martins
