BOBONARO, 28 marsu 2022 (TATOLI) – Governu Korea liuhosi komisaun nasionál United Nations Educational, Scientific and Cultural Organization (UNESCO) iha Timor-Leste serbisu hamutuk ho Diresaun Nasionál Ensisnu Rekorrente, Ministeriu Edukasaun, Juventude no Desportu (MEJD) sei estabelese tán sentru komunitária 16 iha munisípiu tolu.
Governu Korea apoia programa ne’e liuhosi projetu 2020 Free Timor-Leste Project ho durasaun tinan lima, hahú iha tinan 2019 no finaliza iha 2024 ho totál projetu 16 iha munisípiu alvu hamutuk sia, kompostu hosi Dili, Covalima, Baucau, Liquiçá, Oé-Cuse, Baucau, Ainaro, Ermera, Manufahi no Bobonaro ne’ebé mak taxa analfabetizasaun menus hosi 70%.
Maibé dadaun ne’e konklui ona projetu haat mak hanesan, rua iha munisípiu Bobonaro, ida iha Munisípiu Dili no ida hosi munisípiu Covalima no iha tempu badak sei inaugura tán projetu haat iha munisípiu Ermera, Ainaro no Viquque ninia progresu fíziku konstrusaun besik finaliza.
“Tanba ne’e tuir planu iha tinan 2022 ne’e sei estabelese sentru komuntária aprendizajen tolu iha munisípiu Dili iha Atauro, ida iha Oe-cuse no ida iha Manufahi,” Sekretáriu Ezekutivu Interinu Komisaun Nasionál ba UNESCO, Francisco Barreto, informa ba jornalista sira, iha suku Holsa, postu administrativu Maliana, munisípiu Bobonaro segunda ne’e.
Nia esklarese governu Korea apoia orsamentu ba programa ne’e ho objetivu atu hasa’e kualidade edukasaun naun-formál iha Timor-Leste liuhosi programa prinsipál tolu mak hanesan analfabetizaun, ekivalénsia no abilidade vida sei foka liu ba kursu língua ingles no korea inklui kursu komputadór.
Tanba ne’e ba oin molok kontratu remata, UNESCO sei estabelese mós sentru komunitária apredizajen iha munisípiu Baucau no Liquiçá atubele alkansa ojetivu ba planu estratejiku dezenvolvimentu nasionál 2011-2030 katak populasaun Timor-Leste tenke livre hosi analfabetizasaun.
“Atu dehan de’it munisípiu seluk ne’ebé ita la tau prioridade tanba tuir dadus sensu 2015, sira-nia taxaaAnalfabetizaun liu ona 70% ba leten, signifika komunidade barak mak iha ona koñsimentu no abilidadae,” nia katak.
Totál orsamentu ne’ebé governu Korea apoia atu konstrui sentru komunitária aprendizajen iha territóriu nasionál purvolta milaun ida. Orsamentu hirak-ne’e sei distribui uniforme kada projetu sei aloka $20,000.00 hodi konstrui uma ho naruk 20 metru no luan metru ualu ho totál sala tolu kompletu ho fasilidade mobiliáriu no ekipamentu hanesan komputadór.
Jornalista : Sérgio da Cruz
Editór : Evaristo Soares Martins
