DILI, 08 abríl 2022 (TATOLI)—Ministériu Administrasaun Estatál (MAE) relata iha trimestre dahuluk ne’e, MAE ezekuta ona verba Orsamentu Estadu Jerál (OJE) 2022 atinje ona 7.1% ne’ebé ekivalente ho osan hamutuk $6,169,642.86.
“Ita ezekuta ona OJE 2022 iha trimestre dahuluk, hosi fulan-janeiru to’o marsu ne’e, hamutuk $6,169,642.86. Signifika, ita ezekuta OJE 2022 ne’e atinje ona 7,1%,” Vise Ministru Estatál (MAE), Lino de Jesus Torrezão, hateten ba Agência TATOLI, iha nia knar fatin Colmera, Dili, sesta ne’e.
Nia informa, totál despeza ne’ebé mak iha hamutuk $9.214.155,25 ne’ebé kompostu hosi despeza atuál $6,169,642.86, obligasaun hamutuk $1,321,529.49 no kompromisiu $1,722,982.90, entaun totál balansu ka saldo hela $95,785,802.80.
Saláriu no vensimentu hamutuk $787.964,44 (22.47%); bens servisu $3.799.675,43 (45%); kapitál menor $636.500 (52.1%) kapitál dezenvolvimentu $78.817,38 (17.5%) no transferensia públika $4.183.178 (4.6%).
Iha trimestre dahuluk ne’e, MAE mós halo nia atividade hanesan konstrui Uma Kbiit Laek hamutuk 4.000 no halo reabilitasaun sede suku, hadi’a estrada, halo ponte, dada bee-moos ba komunidade iha suku sira iha área rurál.
“Ida-ne’e ami hala’o durante trimestre dahuluk nian no projetu balun seidauk finaliza tanba udan no mós afeta hela ba eleisaun prezidensiál 2022 nian, entaun ida-ne’e mak sai dezafiu ida ba ami,” nia dehan.
Maibé, tuir nia, sira kontinua esforsu nune’e Uma Kbiit Laek ba tinan ne’e bele konklui no kona-ba projetu sira hela uituan de’it ona hanesan reabilitasaun suku 400 hotu ona no hela de’it suku 52 mak seidauk reabilita.
Notísia Relevante: OJE 2022 millaun $33,7 ba MAE aprovadu iha espesialidade
Jornalista : Osória Marques
Editór : Cancio Ximenes
