DILI, 07 jullu 2022 (TATOLI)—Reitór Institutu Superiór Cristal (ISC), Sebastião Pereira, konsidera inisitiva Governu liuhosi Ministériu Ensinu Superiór Siénsia no Kultura (MESSK), prodús rejime estabelesimentu ensinu superiór ne’e di’ak hodi kontrola atividade sira.
Foin lalais ne’e, MESSK aprezenta proposta alterasaun dekretu-lei númeru 8/2010 19 maiu kona-ba rejime estabelesimentu ensinu superiór ba Konsellu Ministru no hetan ona aprovasaun.
“Ha’u hanoin dekretu-lei ne’ebé Ministériu Ensinu Superiór Siénsia no Kultura aprezenta ba Konsellu Ministru hodi hetan aprovasaun no hein promulgasaun hosi Prezidente Repúblika ne’e di’ak tanba bele asegura liután lei anteriór ne’ebé fó rekizitu ba Instituisaun Ensinu Superior sira ne’ebé hakarak loke polo, klase paralela no kampus regular iha munisípiu sira,” Reitór hateten ba Agência Tatoli, iha kampus ISC, Balide, kinta ne’e.
Notísia relevante: MESSK inisia altera rejime estabelesimentu ensinu superiór hodi hadi’a kualidade
Tuir reitór, bainhira tau loke polo, klase paralela no kampus regular iha munisípiu sira tenke uniforme ho kampus sentrál inklui kursu sira ne’ebé maka loke iha munisípiu sira mós tenke akreditadu.
“Atividade prosesu ensinu aprendizajen klase paralela, polo, no kampus regular iha munisípiu sira ne’e hanesan instituisaun foun ida, maibé ho kursu sira ne’ebé akreditadu ona. Ami hatene asuntu ida-ne’e tanba Instituisaun polo Cristal rua ne’ebé ami loke iha Baucau no Same hetan akreditasaun B ho valór 80% hotu, tanba ne’e maka ami loke iha munisípiu rua ne’e hodi apoiu mós estudante sira atu asesu ba ensinu aprendizajen hodi garante kualidade ba estudante sira,” nia tenik.
Aleinde ne’e, ISC mós iha prosesu loke tan polo ida iha Aileu, ne’ebé oras ne’e iha ona preparasaun no iha kondisaun di’ak.
“Tanba instituisaun kontinua kompleta nafatin fasilidade sira hodi hein ministériu halo observasaun no verifikasaun, ne’ebé instituisaun rasik halo ona proposta hodi husu ba ekipa ministériu atu ba haree hodi fó lisensa operasionál,” Reitór akresenta.
ISC polu Aileu iha ona fasilidade hanesan biblioteka fíziku no dijitál, ne’ebé instala hotu ona inklui laboratóriu ba Siénsia Saúde, dosente sira ho grau mestradu, enkuantu grau lisensiatura sira hodi hanorin estudante ba nível baxarelatu.
“Ita bele dehan Aileu mós prienxe hotu ona kritériu, sira hein de’it atu asesu hodi hetan lisensa operasionál,” nia salienta.
Jornalista : Tomé Amado
Editora : Julia Chatarina
