VIQUEQUE, 06 jullu 2022 (TATOLI)–-Protesaun Sivil munisípiu Viqueque no Komisaun Jestaun Risku Dezastre Naturál, kuarta ne’e, hahú distribuisaun pakote emerjénsia ba vítima afetadu inundasaun hosi suku Maluru, postu administrativu Viqueque vila, munisípiu Viqueque.
“Ohin, ami distribui pakote emerjénsia ba ita-nia afetadu inundasaun sira hosi suku Maluru maka simu uluk. Ami iha limitasaun transporte, tan ne’e ami fahe uluk ba suku Maluru,” Koodenadór Protesaun Sivil munisípiu Viqueque, Cirilio Soares Gomes, informa ba Agência Tatoli iha Viqueque vila, kuarta ne’e.
Notísia relevante: Protesaun Sivil Viqueque sei kompleta pakote emerjénsia hafoin distribui ba vítima
Uma-kain afetadu hamutuk 334 iha aldeia Makalosa, Maluru no Lo-oan, iha suku Maluru mak sei simu pakote emerjénsia ne’e.
“Kategoria ba inundasaun, hosi afetadu 334 ne’e, iha uma-kain 102 maka simu uluk pakote emerjénsia, enkuantu uma-kain 232 mak seidauk simu. Sira-ne’e hein faze daruak tanba sasán transporta hosi Dili maka mai. Faze daruak ita depende nasionál, bainhira to’o mai maka ita distribui tan ba vítima afetadu sira,” nia akresenta.
Pakote emerjénsia ne’ebé distribui kompostu hosi foos, mina, biskuit, lona, balde, sanan supermi.
Iha loron kuarta (29/06) to’o kinta (30/06) dadeer akontese udan boot iha parte leste ne’ebé rezulta inundasaun hodi afeta ba komunidade balun nia uma hetan estragu inklui infraestrutura públika balun mós hetan estragu.
Jornalista : Vitorino Lopes da Costa
Editora : Julia Chatarina
