DILI,11 jullu 2022 (TATOLI)— Uniaun Europeia (EU) ho Organizasaun Mundiál Saúde (OMS) apoia medikamentu esensiál tipu hamutuk 221 ba Ministériu Saúde hodi reforsa Unidade Kuidadu Intensivu (ICU) iha Timor-Leste.
Uniaun Europeia hamutuk ho Organizasaun Mundiál Saúde(OMS) halo prosesu aprovizionamentu ba medikamentu esensiál, konsumivél no ekipamentu médiku sira ne’ebé iha tinan kotuk halo ona operalizasaun ba sentru izolamentu Vera-kruz, Lahane no Unidade Kuidadu Intensivu (ICU) iha ospitál referál lima iha munisípiu.
“Apoia ida ne’e Organizasaun Mundiál Saúde (OMS) halo ona kompra ba kuantidade adekuadu ba tinan ida nian ba preparasaun hamutuk medikamentu ho tipu 119 , kompostu medikamentu esensiál 116, konsumavél 53, ekipamentu médiku hodi operalizasaun ICU ho kapasidade kama lima to’o 10 iha ospitál referál lima,” Embaixadór Uniaun Europeia iha Timor Leste, Andrew Jacobs, hateten iha seremonia entrega medikamentu esensiál iha SAMES-Kampu Alór, segunda ne’e.
EU no OMS entrega ai-moruk konsumavél no ekipamentu médiku hanesan ventiladór potavél, mákina ventiladór naun invasivu, konsetradór oksijéniu, oximetru pulsu, kanula oksijéniu nasal nian, instrumentu sirúrjia, antibiotiku, anastétiku no medikamentu esensiál sira seluk ne’ebé utiliza iha ICU iha HNGV inklui mós estasaun avansadu ba anastésia inkubadór ba bebé foin moris ho sira seluk tan.
Iha biban hanesan, Reprezentante Organizasaun Mundiál Saúde (OMS) iha Timor Leste, Arvind Mathur, hateten ho medikamentu esensiál, konsumavél no ekipamentu saúde ba MS ne’e bele apoia ka ajuda salva pasiente sira nia moris.
“Medikamentu no ekipamentus hirak ne’e bele permite iha ospitál referál no Hospitál Nasionál Guido Valadares (HNGV) bele jere kazu kritiku hodi ajuda salva pasiente nia moris,” Arvind Mathur espera.
Entretantu, Minsitra Saúd, Odete Maria Freitas Belo, agradese ba parseiru sira hanesan Uniaun Europeia no Organizasaun Mundiál Saúde ne’ebé mak apoia medikamentu esensiál no ekipamentu saúde iha tempu krítiku nia laran.
“Ami agradese tebes ba apoiu tékniku ne’ebé forte husi OMS no EU ne’ebé fó doasaun laran luak tebes. Ami espera ho kolaborasaun seluk iha futuru,” Governante ne’e agradese.
Jornalista : Felicidade Ximenes
Editór : Florencio Miranda Ximenes
