DILI, (TATOLI) – Polísia Nasionál Timor-Leste (PNTL) liuhosi Servisu Imigrasaun ho Embaixada Indonézia, ohin deporta sidadaun Indonézia hamutuk 12 ne’ebé kaptura iha munisipiu Likisa no kapitál, tanba uza vistu turista hodi servisu iha Timor.
Komandante Servisu Imigrasaun, Inspetór Polísia Fortunato Fausto Guterres, hateten sidadaun sira ne’e deporta ofisialmente hafoin konklui prosesu judisiál no administrativa hodi selu multa ba kofre Estadu.
ʺOrsida depois embaixada Indonézia fó asisténsia ba ninia sidadaun, imigrasaun sei lori kedas ba fronteira Mota-ain hodi entrega ba servisu imigrasaun Indonéziaʺ, haktuir Fausto iha edifísiu servisu imigrasaun Kaikoli, ohin.
Imigrante sira ne’e polísia detein iha munisípiu Likisa no haat iha Dili bainhira hala’o hela konstrusaun ba edifisiu Klibur Domin Tibar nomós hanesan negosiante ambulante iha kapitál.
Hosi janeiru to’o oras ne’e, servisu imigrasaun detein ona imigrante 500 resin hodi submete ba prosesu administrativa nomós abandona volutariamente hodi sai hosi teritóriu, tanba viola vistu. Sira ne’e barak hosi Indonézia, Xina, Filipina no nasaun seluk.
Imigrante ne’ebé viola lei imigrasaun, hanesan kompañia ne’ebé fó servisu tenke multa ba Estadu hosi $250 to’o rihun ida resin bazea ba kategoria infrasaun.
Jornalista: Agapito dos Santos
Editora: Rita Almeida
