DILI, 18 jullu 2022 (TATOLI)–Ministru Finansa (MF), Rui Augusto Gomes, konsidera delegasaun kompeténsia ba kargu xefia iha Komisaun Nasionál Aprovizionamentu (CNA, sigla portugés) iha korridór lei.
“Saida mak Ministériu Finansa halo hanesan delegasaun kompeténsia la’ós nomeasaun, rua ne’e la hanesan. Delegasaun kompeténsia ne’e iha korridór lei, ha’u la nomea diretór, ha’u delega kompeténsia Ministru nian ba ema ne’ebé atu toma konta ba unidade sira ne’e. Ha’u la nomea maibé ha’u delega. Delegasaun kompeténsia ne’e lei fó dalan,” Ministru Rui, hateten iha Palásiu Governu, segunda ne’e.
Notísia relevante: CNA loke ona konkursu ba projetu estrada Laga-Baguia no Quelicai-Ossu
Kestaun ne’e hodi hatan ba inspesaun ekipa konjunta, kompostu hosi Komisaun Funsaun Públika (KFP) no Komisaun Antí-Korrupsaun (CAC, sigla portugés) iha loron 06 jullu 2022, ne’ebé identifika katak nomeasaun ba kargu xefia CNA la tuir lei funsaun públika.
“Kargu xefia tuir lista ne’ebe ami hetan iha CNA, funsionáriu kuadru pesoál hamutuk na’in-38, inklui na’in-tolu ne’ebé nomea hosi Ministru Finansa, ne’ebé uza nia kompeténsia tomak hodi nomea ba iha fatin mamuk balun, maibé antes ne’e KFP rejeita dala-rua kargu delegasaun ne’e tanba dekretu-lei CNA nu’udar Administrasaun direita ne’ebé tutela iha Ministériu Finansa,” Komisáriu KFP, António Freitas, relata hafoin ramata halo inspasaun iha edifísiu Balide.
Nia dehan, atu asume kargu ida mai hosi Administrasaun direta, tenke mai hosi funsionáriu permanente la’ós ajente no kazuál sira.
“Ami husu ba Ministru Finansa atubele esplika serbisu ida-ne’e, maibé realidade laiha resposta hosi Ministeriu Finansa. Kona-ba karta delegasaun ba kargu xefia no koordenadór sira. Tanba ne’e, ami mai husu sira-nia kuadru pesoál sira no kargu xefia diresaun sira-nia rejimentu interna sira ne’e atu prevalese tuir regulamentu ka lae, maibé normalmente sira deklara sertu hotu tanba ne’e, KFP preokupa hodi husu ba CAC sira-nia entendimentu,” nia tenik.
Jornalista : Antónia Gusmão
Editora : Julia Chatarina
