DILI, 19 jullu 2022 (TATOLI)–Komisaun Nasionál Timor-Leste ba United Nations Educational, Scientific and Cultural Organization UNESCO (KNTL-UNESCO) prevee ona fundu millaun $1 ba tinan-lima, hahú hosi tinan 2020 to’o 2024 hodi harii sentru komunitáriu aprendizajen 15 iha postu administrativu 15, iha munisípiu sia iha territóriu nasionál.
Tuir Sekretáriu Ezekutivu KNTL-UNESCO, Francisco Barreto, inisiativa estabelese sentru komunitáriu aprendizajen iha territóriu nasionál maka atu apoiu Ministériu Edukasaun Juventude no Desportu (MEJD) liuhosi Diresaun Nasionál Ensinu Rekorrente (DNER) atu fó fatin ba estudante sira.
“Ita-nia intensaun prevee maka atu apoiu atividade aprendizajen inklui apoiu formasaun ba estudante sira ne’ebé abandona eskola,” Sekretáriu Ezekutivu KNTL-UNESCO informa ba Agência Tatoli, tersa ne’e.
Notísia relevante: MEJD prevee orsamentu $21.000 ba sentru komunitáriu aprendizajen
Nia haktuir, planu loloos ne’ebé komisaun trasa ona maka bainhira to’o tinan 2024 tenke atinje konstrusaun sentru komunitáriu aprendizajen hamutuk 15, ne’ebé sei estabelese iha postu administrativu 15 iha munisípiu sia, enkuantu atividade konstrusaun ba sentru sira ne’e hahú iha tinan 2020, enkuantu sentru haat mak finaliza ona no atividade komesa la’o ona.
“Tinan ne’e, KNTL-UNESCO sei halo tan sentru tolu ne’ebé sei falta sentru ualu maka sei tuir mai, parese prosesu konstrusaun sei konklui iha entre 2023 to’o 2024. Portantu projetu konstrusaun ba kada sentru sira, kada tinan KNTL-UNESCO sei aloka $200.000 hodi harii sentru tolu, atividade aprendizajen inklui formasaun ba estudante sira,” nia akresenta.
Iha tinan 2022 ne’e, komisaun sei estabelese tan sentru tolu no tuir planu sei halo iha munisípiu Baucau, Manufahi no Rejiaun Administrativu Espesiál Oé-cusse Ambeno (RAEOA).
“Konstrusaun ne’e la liu hosi kompañia, ne’ebé orsamentu ba konstrusaun ne’e sei jere rasik hosi sentru komunitáriu aprendizajen,” nia tenik.
Jornalista : Tomé Amado
Editora : Julia Chatarina
