DILI, 17 august 2022 (TATOLI)- Komisaun Dezlutu Max Stahl (KDMS) informa ba Sekretaria Estadu Juventude no Desportu (SSJD) kona-ba preparasaun serimónia dezlutu ba matebian journalista Max Stahl ne’ebé sei realiza iha 28 outubru 2022.
Prezidente KDMS, Rogério Castro da Cruz esplika, objetivu sorumutu ne’e inform ba SEJD relasiona ho serimónia dezlutu ba matebian Max Stahl.
“Ami informa ba governu liuhosi SEJD kona-ba koordenasaun entre komisaun no estadu ba preparasaun serimónia dezlutu Max Sthal, no mós fó bensuan ba matebian nia rate,’’ Prezidente KDMS, Rogério Castro da Crus, informa ba jornalista sira, iha Lecidere, kuarta ne’e.
Nia dehan, konstrusaun ba matebian Max Stahl nia rate oras nee atinje ona 95% no sei finaliza iha tempu barak.
KDMS mós informa ba SEJD kona-ba selebrasaun dezlutu, ne’ebé mak akontese hanesan ho matebian juventude loriku asuwa’in Sebastião Gomes iha loron 28 outubru.
“Ami rekomenda ba governu atubele deside kalendáriu fisku ba komemorasaun serimónia ba sira na’in-rua,” nia fó hanoin.
Diretór Nasionál SEJD, Jacinto António Ximenes, haksolok tebes simu rekomendasaun hosi komisaun kona-ba serimónia dezlutu ba Max Stahl ne’e.
Nune’e SEJD sei buka apoia orsamentu atu utiliza ba serimónia dezlutu matebian Max Stahl no matebian Sebastião Gomes, ne’ebé mak sai autór ba akontesimentu masakre 12 Novembru.
“Ami apoia komisaun hodi realiza eventu ba komemorasaun dezlutu ba matebian Max Stahl no Sebastião Gomes,” nia katak.
“Maibé oras ne’e daudaun ami seidauk bele atu informa kona-ba planu orsamentu hira mak sei prepara ba eventu refere. Ita presiza duni iha koordenasaun entre liña ministériu sira atubele aloka orsamentu. Max Stahl sakrifika ona nia vida tomak ba Timor-Leste.”
Sebastião Gomes nu’udar juventude ida hetan tiru hosi militár Indonézia no mate iha 28 outubru 1991 iha igreja Motael.
Max Stahl koñesida nu’udar jornalista estranjeiru ida-ne’ebé mak estadu rekoñese ona hanesan sidadaun Timoroan. Matebian mós iha ona produsaun ba sentru Audiovizuál Max Stahl Timor-Leste (CAMSTL).
CAMSL prodús ona filme 3500 no sai ona arkivu ba istória nasionál. Arkivu independénsia Timor-Leste ne’ebé hetan mós rekoñesimentu husi UNESCO iha tinan 2013, nu’udar dokumentu patrimóniu mundiál.
Matebian Max Stahl nu’udar jornalista profiionál hala’o nia kna’ar hodi kobertura ba Sebastião Gomes nia mate no mós akontesimentu masakre 12 Novembru iha tinan 1991.
Notísia relevante:
Journalista: José Belarmino De Sá
Editór: Evaristo Soares Martins
