DILI, 18 agostu 2022 (TATOLI)—Primeiru-Ministru (PM), Taur Matan Ruak, hateten ekipa ida hosi Governu sei dezloka fila-fali hodi halo preparativu no apoiu tékniku ba prosesu eleisaun iha Guiné-Bissau.
Notísia Relevante: Vise-MAE nomeadu sai reprezentante espesiál ba prosesu resensiamentu eleitorál Guiné-Bisau
“Enkontru semenál ho Prezidente Repúblika ami ko’alia asuntu rua de’it. Ida mak ita-nia apoiu ba eleisaun Guiné-Bissau no ida seluk mak aban reuniaun Konsellu Defeza Seguransa ne’ebé sei fó pose ba membru foun sira,” Xefe Governu ne’e hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau obato, Bairru Pite, kinta ne’e.
Taur dehan, hosi parte Governu haruka tiha ona ekipa ida ba Guin’e-Bissau no ekipa ne’e fila ona ne’ebé horisehik halo aprezentasaun iha reuniaun Konsellu Ministru (KM).
“Entaun ita deside ekipa ida fila-fali hodi halo preparativu no apoiu tékniku, atu nune’e sira-nia resensiamentu no preparativu tékniku sira seluk hodi fasilita prosesu eleisaun,” nia dehan.
Asaun ne’ebé Governu Timor-Leste halo la’ós buat foun maibé ne’e antes ne’e la’o, nune’e agora kontinua de’it.
“Apoiu ida-ne’e ita halo tiha ona, entaun ita kontinua de’it. Ne’e la’ós atividade foun ida tanba ita investe tiha ona ekipamentu iha ne’ebá entaun tempu kuandu sira halo eleisaun ita sempre partisipa. Hanesan ita-boot sira (jornalista) hatene ita uluk ajuda tiha ona iha 2018 mós ita haruka tiha ona grupu ida ba no foin daudaun ita haruka tan grupu ida ba antes ida-ne’e grupu ida ba prepara kondisaun tékniku hotu hodi ajuda sira,” nia dehan.
Enkuantu, PM Taur informa Governu prevee orsamentu destina millaun $1 ba de’it atividade ida ne’e no despeza ba ekipa no mós apoiu tékniku sira.
Jornalista : Nelson de Sousa
Editór : Cancio Ximenes
