HEADLINE, INTERNASIONÁL, NASIONÁL, POLÍTIKA

Vise-MAE nomeadu sai reprezentante espesiál ba prosesu resensiamentu eleitorál Guiné-Bisau

Vise-MAE nomeadu sai reprezentante espesiál ba prosesu resensiamentu eleitorál Guiné-Bisau

Vise-Ministru Administrasaun Estatál, Lino de Jesus Torezão. Imajen Tatoli/Francisco Sony

DILI, 13 jullu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu, ne’ebé aprezenta hosi Ministru Administrasaun Estatál, Miguel Pereira de Carvalho, kona-ba misaun apoiu ba prosesu resensiamentu eleitorál iha Guiné-Bisau ba tinan 2022.

“Rezolusaun Governu ne’e aprova hodi nomea Vise-Ministru Administrasaun Estatál, Lino de Jesus Torrezão, hanesan reprezentante espesiál Governu Timor-Leste nian hamutuk ho Governu Guiné-Bisau hodi halo prosesu identifikasaun ba nesesidade hosi Estadu ida-ne’e ba realizasaun eleisaun livre no justu iha loron 18 dezembru 2022 oin mai,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Notísia relevante: Xanana: “Uluk, TL sai ezemplu ba Guiné-Bissau kona-ba harii Estadu”

Portavós Governu ne’e dehan, reprezentante Governu Timor-Leste ne’e ninia misaun prinsipál mak atu haree resensiamentu no eleisaun, ne’ebé misaun hanesan iha tinan hirak liubá mós halo ona.

“Antes ne’e, Timor-Leste haruka delegasaun ida ba Guiné-Bisaun, ne’ebé xefia hosi Tomas Cabral no agora delega fali misaun ida no sei ba lideradu hosi Vise-MAE. Hafoin nia ho delegasaun vizita nu’udar reprezentante Governu iha Guiné-Bisau, filafali mai sei hato’o relatóriu ba Governu,” nia esplika.

Desizaun ne’e Governu halo hodi resposta ba pedidu hosi Guiné-Bisau liuhosi ninia Primeiru-Ministru.

“Ein vez de ita responde de’it maibe diretamente ita hili opsaun ida atu haruka uluk Vise-MAE ba haree didi’ak lai, ita bele ajuda iha ne’ebé no relata ba Konsellu Ministru hodi halo desizaun,” nia tenik.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!