Kopa Mundiál 2026: Korea Súl hamihis Repúblika Cheka nia mehi ho golu 2-1
DILI, 12 Juñu 2026 (TATOLI)–Korea Súl hahú ho nia vitória iha Kopa Mundiál FIFA 2026 hafoin hamihis Repúblika Cheka nia mehi ho golu 2-1, iha jogu Grupu A ne’ebé hala’o iha Estádiu Guadalajara, Zapopan, Sesta (12 Juñu 2026) meiudia oras Timor-Leste.
Notísia Relevante: Méxiku semo aas liki Áfrika Súl 2-0 iha abertura Kopa Mundiál 2026
Ho rezultadu ne’e, Korea Súl rekolla pontu tolu importante no tuur iha pozisaun daruak Grupu A, no Méxiku okupa pozisaun iha Korea Súl nia okos, tanba lidera ho diferensa golu hafoin manán 2-0 hasoru Áfrika Súl oras balun liuba.
Jogu primeira parte hahú, jogadór husi ekipa rua pasa bola ba malu no kria opostunidade ba malu iha minutu dahuluk. Repúblika Cheka ne’ebé lidera husi kaptaun Tomáš Souček, hatudu nia konsege organiza ho di’ak iha liña meia kampu.
Ho kontra-atake ne’ebé jogadôr sira halo laiha ida mak hatolun rezulatdu golu, nune’e to’o jogu primeira parte termina rezultadu mantein 0-0.
Hakat ba segunda parte, ekipa rua kontinua luta, oinsá bele fó vitoria ba sira-nia nasaun, tanba jogu kmanek ne’e la’ós natoon de’it iha jogu atu diverte an maibé tanba sir aida-idak reprezenta sira-nia nasaun.
Cheka halo presaun maka’as nune’e rejulta duni golu iha minutu 59 liu jogadór Ladislav Krejčí hodi nakfilak rezultadu ba 1-0.
Maske sofre ona golu ida, maibé Korea Súl la fó nia pontu fraku iha ema rihun ba rihun nia oin. Treinadór Korea foti desizaun halo mudansa signifikante. Presaun aas hahú fó rezultadu iha minutu 67 bainhira Hwang In-beom simu bola iha liña ninin no suta distánsia dook, bola tama liu husi guarda-rede Matej Kovar nia liman, muda rezultadu empata 1-1. Ho golu ne’e, Estádiu sai hetok barullu liután, hanesan injeta hela espíritu jogu atu hamoris jogu ne’e sai furak liután.
Impaktu golu ne’e todan tebes ba Cheka. Korea kontinua atake no hetan tan oportunidade osan mean iha minutu 80, bainhira simu bola husi Son Heung-min nia ain, simu kedan husi Oh Hyeon-gyu iha área laran ne’ebé ho kalma tebes finaliza ho ain loos hodi muda rezultadu ba 2-1.
Iha minutu 10 ikus sai minute dramátiku. Repúblika Cheka esforsu makaa’as hodi buka golu atu empata, nune’e jogadór Patrik Schick marka xutu ida iha minutu 88, maibé guarda-rede Kim Seung-gyu salva hodi garante vitória ba nasaun husi Azia nian.
Formatu jogu Korea Súl (4-2-3-1):
Kim Seung-gyu (1); Lee Han-beom (2), Kim Min-jae (4), Lee Gi-Hyuk (3), Seol Young-Woo (22); Hwang In-beom (6), Paik Seung-Ho (8); Lee Tae-seok (13), Lee Kang-in (19), Son Heung-min (7) kaptaun; Lee Jae-sung (10).
Formatu jogu Repúblika Cheka (4-3-3):
Matej Kovar (1); Ladislav Krejčí (7), Robin Hranáč (4), Štěpán Chaloupek (6), Jan Zelený (20); Adam Sojka (24), Tomáš Souček (22) kaptaun, Vladimír Coufal (5); Pavel Šulc (15), Patrik Schick (10), Lukáš Provod (17).
Vitória ne’e, Grupu A sai ‘grupu mate’ duni. Mexico lidera ho pontu 3 +2 golu, Korea Súl iha daruak ho pontu 3 +1 golu, enkuantu Áfrika Súl no Repúblika Cheka seidauk iha pontu. Jornadas tuir mai sei deside se mak avansa ba faze 16 finál.
Jornalista : Hortêncio Sanchez
Editór : Cancio Ximenes
