DILI, 23 agostu 2022 (TATOLI)—Líder Rezisténsia no Reprezentante Conselho Nacional de Resistência Timorense (CNRT) ne’ebé servisu hamutuk ho líder Por-Autonomia iha Konsulta Populár 30 Agostu 1999, Leandro Isaac, hateten atu garante pás, establidade no seguransa presiza iha líder ne’ebé mak transparénsia nune’e dezenvolvimentu bele la’o.
Notísia Relevante: Tinan 22 Konsulta Populár, povu moris ho injustisa sosiál
“Bainhira atu iha pás no estabilidade mak tenke hatuur buat hotu-hotu iha nia fatin, hafoin bolu líder sira tuur hamutuk hodi iha transparénsia ba povu ida-idak nia deklarasaun mak garante pás, estabilidade, seguransa, no dezenvolvimentu bele la’o nune’e povu sente iha dezenvolviementu,” Leandro Isaac hateten ba Agência Tatoli, relasiona ho komemorasaun aniversáriu loron Konsulta Populár ba dala-XXIII (30 agostu 1999-30 agostu 2022) ho tema “Ho espiritu loron konsulta populár 30 agostu 1999 mai ita hametin pás no estabilidade ba dezenvolvimentu iha ita-nia rai Timor-Leste”, liuhosi telefónika.
Ho nune’e, povu hatene líder ida-ne’ebé mak lakohi rai ne’e iha pás, estabilidade no seguransa hodi halo dezenvolvimentu ba povu no rai ida-ne’e no ba futuru ne’ebé di’ak.
Atu iha transparánsia mak dalan úniku públiku akompaña no kontrola, nune’e povu hatene líder sé mak lakohi pás, estabilidade, seguransa no dezenvolvimentu ba rai ida-ne’e, tanba realidade ne’ebé iha polítika iha ida-idak nia gaveta de’it.
Tanba, ukun rasik an ne’e garante hakmatek tenke iha pás no estabilidade no seguransa ne’ebé mak bele garante dezenvolvimentu ba povu.
“Tanba ita hakarak ukun-an ne’e atu hakiak rasik estabilidade polítika no garante dezenvolvimentu ba povu. Se ida-ne’e mak laiha, ha’u dehan, ha’u mós autór ida ba referendu 1999 nian, ha’u Leandro Isaac, ha’u hakarak deklara ba TATOLI katak ha’u arrepende (menyesal), haree ukun rasik an hanesan ne’e. Entaun, ha’u hanoin ita-nia maluk iha Kupang, Atambua ne’ebá lalika mai ida,” nia haktuir.
Notísia Relevante: Tinan 1999, Xanana Gusmão orienta FALINTIL hakmatek
Tanba, nia dehan, líder ho líder mak laiha estabilidade enkuantu ema ida uluk pró-autonomia ne’ebé hela iha ema-nia rain ne’ebá.
Sé mak lakohi pás no estabilidade ba povu no rai ida-ne’e, presiza onestidade maske iha diferensa opiniaun, tanba liuhosi oestidade mak atu haburas demokrásia tanba Estadu de Direitu maibé pás no estabilidade ba dezenvolvimentu ne’e tenke fundamentál, tantu hosi líder hosi rai-laran, líder hosi rai-li’ur ka líder boot-boot sira iha Timor-Leste.
“Tanba ne’e, ha’u hakarak atu dehan de’it kuandu laiha pás no estabilidade mak sei laiha dezenvolvimentu. Nune’e husu líder sira tenke haree kestaun ne’e, presiza hatene povu nia nesesidade. Se líder la konsidera pás no estabilidade mak apelu laiha folin no folin laiha duni,” nai dehan.
Haree hosi tinan 23 ba kotuk, nia dehan, laiha estabilidade tanba estabilidade polítika laiha hosi keda Primeiru Governu Konstitusionál to’o agora ukun an ne’e laloos.
“Tanba ida-ne’e duni mak ha’u dehan laiha duni pás no estabilidade ne’e. Tanba povu sei moris iha mukit nia laran mezmu ita aprova osan biliaun barak-barak, to’o deve tan osan iha banku Internasionál maibé moris povu nian marka pasu, laiha mudansa tanba de’it interrese polítika, entaun seidauk ukun ho loloos,” nia hateten.
Ida-ne’e akontese tanba laiha estabilidade polítika, maibé di’ak tanba la halo funu maibé estabilidade mak laiha liu.
Notísia Relevante: Xanana Gusmão: “Ita na’in-rua nia diferensa sei hanaruk povu nia sofrimentu”
Rezultadu konsulta populár deside povu nia hakarak ba ukun rasik an
Jornalista : Osória Marques
Editór : Cancio Ximenes
