VIQUEQUE, 26 agostu 2022 (TATOLI)—Postu saúde Uaitame iha postu administrativu Uatulari, munsípiu Viqueque, rejista moras Insfesaun Respiratóriu Aguda (ISPA) hamutuk 200 iha durante fulan-hitu.
“Ami rejista moras ne’ebé ho númeru boot liu mak ISPA hamutuk 200 iha fulan-janeiru to’o jullu tinan ne’e, moras seluk ladún iha,” Enfermeiru postu saúde Uaitame, Joanita Amaral, informa ba Agência Tatoli, iha postu saúde, sesta ne’e.
Moras ne’e akontese tanba kauza hosi estrada ne’ebé daudaun ne’e ema aterru hela rai henek ba no mosu rai rahun barak.
“Ami sempre halo atendimentu ba komunidade ne’ebé halo tratamentu iha postu ne’e no ami iha ne’e stock ai-moruk sufisiente hodi fó ba komunidade,” nia akresenta.
Aleinde ne’e, pesoál saúde sira mós hato’o preokupasaun sira ne’ebé hasoru hanesan bee-moos, lutu protesaun no eletrisidade.
“Ami iha ne’e bee-moos mai postu saúde laiha, lutu protesaun mós laiha no eletrisidade agora la lakan. Nune’e, bainhira pasiente emerjénsia sira mai kalan, ami leno ho lampra de’it tanba uma-laran nakukun loos. Preokupasaun sira ne’e ami hato’o hotu ona maibé seidauk responde,” nia tenik.
Notísia relevante: Sentru saúde Uatucarbau rejista ISPA 1.000 durante fulan-hitu
Nia haktuir mós katak, bainhira lutu protesaun laiha, ema halimar bola iha resintu postu saúde no halo rahun vidru.
“Kama ba emerjénsia agora laiha halo pasiente sira mai toba iha kadeira leten maka ami fó atendimentu. Tanba ne’e ami husu parte relevante fó apoiu kama ba ami hodi tau iha fatin emerjénsia,” Enfermeiru ne’e hato’o.
Maski hasoru difikuldade maibé pesoál saúde sira nafatin fó atendimentu ba komunidade hosi dadeer to’o lorokraik, depende ba pasiente sira mai iha postu saúde no dalaruma bele atende loron ida pasiente na’in-30.
Enkuantu, pesoál ne’ebé destaka iha postu saúde Uaitame hamutuk lima, kompostu hosi parteira ida, enfermeira rua, saúde ida no seguransa ida.
Jornalista : Vitorino Lopes da Costa
Editora : Julia Chatarina
