OÉ-CUSSE, 26 agostu 2022 (TATOLI) – Xefe Estadu Maiór FALINTIL-Forsa Defeza Timor-Leste, (F-FDTL) Tenente Jenerál Falur Rate Laek, husu ba povu iha Rejiaun Administrativa Espesiál Oé-Cusse Ambeno (RAEOA), atu hato’o keixa ba komandu bainhira membru sira halo krime hasoru komunidade sira iha rejiaun ne’e.
“Ha’u husu komunidade sira-ne’ebé besik iha postu ne’e, problema ruma mak imi-oan no alin sira, halo problema ka krime ruma ba imi, halo keixa, bele telefone direita ba ha’u, sei ha’u hatene, hau sei haruka kedas ekipa ida mai toma medida ba sira, fó sansaun ba sira, ida-ne’e mak ha’u hakarak husu ba inan-aman sira iha Oé-Cusse, tanba imi dook hosi kapitál,” Falur Rate Laek apela iha ámbitu inaugurasaun edifísiu F-FDTL iha Oé-Cusse, sesta ne’e.
Nia afirma, maske povu beik no kiak maibé labele halo kanek sira-nia fuan, tán ne’e forsa agora sai hanesan forsa vokasionadu atu sai hanesan forsa populár povu nian, nune’e husu ba komandante no militár hotu tenke tau nia-aan iha nia fatin, forsa ida-ne’ebé edukadau no forsa ida-ne’ebé sivilizadu.
“Ha’u hakarak komandante ne’ebé atu mai iha Oé-Cusse, komandante komponente fó instrusaun no diretiva estabelese norma ezekusaun permanente, kuda ai haleu edifísiu ne’e, hamatak no hamahon ita-nia fatin,” nia fó hanoin.
Iha parte seluk, Tenenete Jenerál ne’e husu promove koordenasaun serbisu no halo diskusaun ho parte floresta sira iha RAEOA, hodi kuda ai ne’ebé viável atu kuda, no kontinua tau matan nafatin atu moris, atu halo imajen di’ak ba postu F-FDTL iha Oé-Cusse.
“Uluk ita uza natureza, ita-nia rai no ai-laran, anin, tasi no bee, sai hanesan ita-nia belun di’ak, ohin ita tenke valoriza ba sira, hodi hamahon ita, hamatak no haburas ita,” nia akresenta.
Notísia relevante: Forsa Armada planeia destaka kompañia independente ho estatutu autónomu iha RAEOA
Jornalista: Abílio Elo Nini
Editór: Evaristo Soares Martins
