VIQUEQUE, 12 setembru 2022 (TATOLI)–Komunidade aldeia Kai-Ua, suku Liaruka, postu administrativu Ossu, munisípiu Viqueque uma-kain 92, ho abitante hamutuk 1.000, daudaun ne’e seidauk asesu bee-moos.
“Populasaun la’o kilómetru rua hafoin sira kuru bee-moos iha mota hodi konsumu loron-loron nian,” Xefe aldeia Kaiwa, Andre Soares, hateten iha suku Liaruka, segunda ne’e.
Nia haktuir, uluk tinan 2014 organizasaun naun govermentál (ONG) ida mak dada bee-moos ba komunidade maibé a’at ona no dadaun bee lai mai.
“Bee-moos ne’ebé ONG dada a’at kleur ona, nune’e agora komunidade hasoru difikuldade asesu bee-moos,” nia akresenta.
Notísia relevante: Governu halo negosiasaun ho ADB molok husu empréstimu finansia projetu bee-moos
Autoridade aldeia ne’e hato’o ona preokupasaun ne’e ba Governu maibé seidauk iha resposta.
Iha fatin hanesan, Xefe suku Liaruka, Franscisco Soares, preokupa ho kondisaun ne’e tanba bee-moos importante ba komunidade hodi hala’o atividade loron-loron.
“Ha’u husu Governu atu tau-atensaun ba komunidade ne’ebé seidauk asesu bee-moos,” nia tenik.
Seidauk asesu rede telkomunikasaun
Aleinde ne’e, Xefe Suku Liaruka, Francisco Soares, hato’o preokupasaun kona-ba rede telelekomunikasaun, ne’ebé difikulta komunidade atu komunika ba família sira.
“Ami iha ne’e asesu rede susar liu, jaringan laiha. Ohin loron ema tur iha uma de’it maka telefoni ba malu, maibé komunidade iha ne’e tenke buka rede maka foin telefoni. Buka rede mós tenke la’o dook mak foin hetan,” nia relata
Nia husu, empreza telkomunikasaun tolu (Timor Telecom, Telkomcel no Telemor) ne’ebé eziste iha Timor-Leste presiza harii torre telkomunikasaun ruma hodi komunidade bele asesu.
“Agora ne’e mundu teknolojia, ema hotu uza hodi komunika ba malu no asesu informasaun liuhosi rede internet, maibé oin loron ami hasoru difikuldade asesu telkomunikasaun,” nia tenik.
Iha fatin ketak, Xefe Aldeia Kai-Ua, Andre Soares, husu ba entidade kompetente atu tau-matan ba kondisaun ne’e.
“Bainhira ami atu telefoni ba família tenke buka rede kuaze kilómetru haat maka foin hetan hodi kontaktu,” nia salienta.
Jornalista : Vitorino Lopes da Costa
Editora : Julia Chatarina
