EKONOMIA, HEADLINE, INTERNASIONÁL

Governu halo negosiasaun ho ADB molok husu empréstimu finansia projetu bee-moos

Governu halo negosiasaun ho ADB molok husu empréstimu finansia projetu bee-moos

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (03/08). Imajen Tatoli/Francisco Sony

DILI, 03 agostu 2022 (TATOLI)–Governu liuhosi reuniaun Konsellu Ministru (KM), kuarta ne’e, delibera hodi autoriza Ministru Finansa (MF), Rui Augusto Gomes, hodi hahú halo negosiasaun ho Banku Dezenvolvimentu Aziátiku (ADB, sigla inglés) kona-ba kondisaun espesífika sira empréstimu ba projetu fornesimentu bee ba zona oeste Dili.

“Aleinde projetu sira seluk ne’ebé daudaun ne’é la’o hela hodi hadi’a fornesimentu bee sidade Dili nian, Governu oras ne’e hakarak atu mobiliza asisténsia finanseira iha forma empréstimu sira hodi hadi’a fornesimentu bee ba zona oeste iha sidade ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: Governu no Banku Mundiál sei selebra akordu finansiamentu projetu fornesimentu bee-moos

Portavós Governu dehan, Dili oeste ne’e parte hosi tasi-tolu nian tesik ba, hanesan parte ida hosi komponente boot ba projetu ida karik avansa dala-ida sei gasta hamutuk biliaun $1, atu bee-moos ba uma-kain sira iha Dili no mós atu hadi’a esgotu sira iha Dili.

“Hanoin ba karaterístika projetu no finansiamentu ne’ebé presiza, Banku Aziátiku Dezenvolvimentu aprezenta nia-an hanesan kontraparte ne’ebé adekuada hodi prepara finansiamentu,” nia akresenta.

Governu hetan ona apoiu finanseira millaun $420 hosi Governu amerikanu liuhosi Millennium Challenge Corporation (MCC) ne’e ba Dili sentrál, enkuantu foin lalais Governu asina ona akordu empréstumu hosi Banku Mundiál ho montante miliaun $121 hodi fornese bee-moos ba Dili parte leste.

Nune’e, ho autorizasaun ida-ne’e Governu sei negosia, hafoin iha tempu badak bele finaliza empréstimu ho kondisaun di’ak hosi ADB atu finansia dezenvolvimentu projetu bee-moos ba Dili oeste.

“Ne’e pasu importante boot ida mai Timor-Leste, liliu ba sidadaun sira ne’ebé mak daudaun hela iha Dili,” nia tenik.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!