DILI, 13 setembru 2022 (TATOLI)–Diretór Ezekutivu Ajénsia Teknolojia Informasaun no Komunikasaun, Institutu Públiku (TIC Timor, I.P), Roberto de Sousa Vicente, hateten, iha projetu importante rua ne’ebé daudaun dezenvolve hela no hamosu esbosu ne’ebé submete ona ba Primeiru-Ministru (PM), Taur Matan Ruak, atu aprezenta no hetan aprovasaun iha Konsellu Ministru.
Projetu ida mak hanesan esbosu dokumentu estratéjiku hanaran Timór Dijitál 2022 to’o 2030 hodi atinje objetivu ba reforma administrativa no projetu Identidade Únika.
“Dokumentu ne’e bainhira aprova sei sai baze ba esbosu dijitalizasaun Governu tomak hahú hosi tinan 2022 to’o 2032, bainhira ita deklara katak ita-nia nasaun ne’e dijitalizadu. Dokumentu ne’e mós sei serve hanesan dokumentu prinsipál sira bainhira partikularmente ita-nia parseiru dezenvolvimentu hakarak ajuda liña ministeriál sira, bele konsulta didi’ak no planu Governu iha dokumentu estratéjiku Timór Dijitál. Nune’e mós liña ministeriál sira bainhira atu dezenvolve sistema sentrál, ezemplu Ministériu Saúde, Justisa no seluk tan,” Diretór Ezekutivu informa hafoin relata progresu servisu ba Xefe Governu, iha Rezidénsia Farol, tersa ne’e.
Notísia relevante: Governu aprova programa reforma administrasaun públika
Projetu importante seluk maka projetu Identidade Únika, ne’ebé hakarak atribui númeru dijitál ida ba sidadaun tomak, hahú hosi moris to’o mate.
“Estadu sei atribui númeru ID Únika atu sidadaun ida bele uza asesu servisu ne’ebé Governu ka setór privadu sira fó, ezemplu atu trata dokumentu hanesan kartaun kondusaun ka dokumentu sira seluk,” nia akresenta.
Ligadu ho Governu eletróniku, daudaun TIC Timor hahú oferese ona plataforma dijitál, ezemplu maka iha Servisu Rejistu no Verifikasaun Emprezariál, Institutu Públiku (SERVE, I.P) bainhira rejista kompañia foun la persiza ona direta ba edifísiu maibé liuhosi de’it sistema ne’ebé sira oferese.
“Planu jerál Governu ne’e sei atinje bainhira dokumentu estratejiku ne’e aprovadu hodi sai baze ba instituisaun Estadu sira atu haktuir hodi dezenvolve plataforma dijitál sira,” nia tenik.
Jornalista : Antónia Gusmão
Editora : Julia Chatarina
