BAUCAU, 14 setembru 2022 (TATOLI) – Autoridade suku Buruma hahú implementa Programa Mão de Obra Postu Administrativu (PMOPA) liuhosi atividade tolu.
Xefe suku Buruma, postu administrativu Baucau Vila, Liborio dos Santos Freitas, esplika, atividade tolu kompostu limpeza jerál estrada públiku hanesan iha tasi, limpeza semiteiru no konstrui lutu hodi proteje bee-matan ne’ebé implementa durante semana-ida ona.
“Atividade hanesan ne’e importante tanba agora atu mobiliza hamoos fatin públiku sira susar oituan entaun governu implementa programa ne’e bele ajuda ami suku atubele limpeza dalan públiku,” Xefe suku Buruma ko’alia iha Vila Nova, kuarta ne’e.
Liborio Freitas konsidera programa refere importante tanba alende rekuperasaun ekonómiku maibé ajuda autoridade suku hamoos fatin públiku ne’ebé konsideradu importante atu komunidade sira koopera no fó atensaun.
PMOPA iha suku Burumu fahe ba grupu tolu ne’ebé kada grupu sei envolve traballadór na’in-20.
Liborio Freitas, esplika, bainhira atividade limpeza jerál remata sei kontinua ho atividade reparasaun estrada iha área suku ba aldeia hodi kompleta loron-18 serbisu nian.
Traballadór sira iha kada grupu kompostu hosi kada aldeia ne’ebé maioria envolve hosi feto no sei halo rotasaun tuir durasaun loron serbisu relasiona ho interese komuinidade iha programa refere.
Suku Buruma kompostu aldeia haat hanesan aldeia Tasi, Casmuto, Ono-sere no Suli-ua ho totál populasaun hamutuk 3.639.
Jornalista : Natalino Belo
Editór : Evaristo Soares Martins
