DILI, 14 outubru 2022 (TATOLI) – Eis Prezidente Autoridade Rejiaun Administrativa Espesiál Oé-Cusse Ambeno (RAEOA), Mari Alkatiri, fó-sai katak daudaun ne’e hahú prepara tripulante ba Ró Haksolok tanba tinan 2023 ró ne’e mai Timor-Leste.
“Estaleiru ne’e ho saham 95% no daudaun ne’e Timor-Leste kontrata ona traballadór na’in-30 hahú serbisu ona, tanba sei iha serbisu seluk atu aumenta, tanba daudaun ne’e mós ita hahú ona forma tripulante prepara ba ró haksolok,” Mari Alkatiri, fó-sai iha aeroportu internasionál Nicolau Lobato, sesta ne’e.
Alkatiri vizita Portugál atu buka solusaun no rezolve Ró Haksolok, nune’e fulan oin hahú serbisu nune’e tinan oin bele fila ona mai Timor-Leste.
Maibé Eis Primeiru Ministru ne’e afirma, la’ós ida-ne’e de’it mak solusaun di’ak, tanba sei presiza haree mós kestaun balun.
“Hakarak ka lakohi tenki mai, ha’u hatene saida mak ha’u halo no saida maka presiza halo tán iha futuru,” Mari Alkatiri subliña.
Antigu Prezidente RAEOA ne’e fundamenta, kona-bá estaleiru nian hanesan indústria serbisu ba portu Ró Haksolok, Timor-Leste kontrola asaun ho 95%, ne’e signifika osan iha daudaun la’ós atu hadi’a no rezolve.
“Maibé como ita kontrola 95% saham, signifika ró ne’e Timor-Leste nian. Maibé osan ne’e atu uza tanba ita kontrola saham iha estaleiru ne’e, signifika osan ne’e tenke iha retornu, la’ós balu ko’alia naran-naran kona-bá osan ne’e ba hamoris fali empreza iha rai li’ur,” nia afirma.
Tuir nia, konstrusaun ba ró Haksolok seidauk hahú nia serbisu tanba estaleiru konstrusaun sei atinje 75% dezde uluk to’o agora.
“Ró Haksolok sei mai Timor-Leste, empreza espesializada sira mak ba haree ona ró ne’e, no ró ne’e prontu atu halo hotu no prontu fila mai Timor-Leste,” nia katak.
Prezidente Autoridade Rejiaun Aministrativa Espesiál Oé-Cusse Ambeno (RAEOA), Arsénio Paixão Bano, informa, daudaun ne’e nia parte seidauk fó sai deklarasaun ba públiku kona-bá ró Haksolok, tanba sei aprezenta uluk rezultadu durante halo fiskalizasaun ba ró haksolok iha Portugál ba Primeiru Ministru, Taur Matan Ruak.
“Públiku hatene katak molok ha’u ba vizita iha li’ur, ha’u aprezenta planu serbisu ba PM no troka ideia kona-bá parte lala’ok rekuperasaun ró Haksolok. Iha sorumutu ne’ebá, planu mak fila hosi vizita ne’e no sorumutu tékniku ramata hotu mak ha’u bele hato’o atualizasaun. enkontru ikus ne’ebé hala’o iha Portugál hala’o só lideransa Mari Alkatiri iha loron 10 outubru nune’e iha dia 17 agora ita sei atualiza ba PM,” Arsénio Paixão Bano, informa ba Agência Tatoli sesta ne’e.
Relasiona ho deklarasaun Mari Alkatiri nian kona-bá tripulante, Autoridade RAEOA lideradu Arsénio Paixão Bano prevee tán orsamentu rihun $32 iha proposta Orsamentu Jerál Estadu (OJE) 2023 kona-ba formasaun tripulante Ró Haksolok nian.
“Formasaun tripulasaun ba Embarkasaun Haksolok”, veba ne’e prevista iha livru Devenvolvimentu Orsamentál ne’ebé Agência Tatoli, asesu hosi portál Ministériu Finansa, sesta ne’e.
RAEOA propoin millaun $120 iha OJE 2023
Hosi montante millaun $120 ne’e komposta hosi millaun $84 ba administrasaun iha rejiaun no millaun $36 prevee iha Fundu Espesiál ba Dezenvolvimentu (FED).
Hosi millaun $36 ne’e inklui rihun $32 ba formasaun futuru tripulante Ró Haksolok nian.
Notísia relevente: OJE 2023: RAEOA define programa 16 korresponde ho millaun $120
Jornalista: Abílio Elo Nini
Editór: Evaristo Soares Martins
