VIQUEQUE, 18 outubru 2022 (TATOLI)– Administradór munisípiu Viqueque, Januário Soares “Bolly” hateten, proposta Orsamentu Jerál Estadu (OJE) tinan 2023 ba administrasaun Munisipiu Viqueque propoin alokasaun orsamentu millaun $6.9. Orsamentu ne’e atu benfísia ba programa sanulu resin-ida iha Viqueque.
“Proposta orsamentu ba planu dezenvovimentu iha tinan 2023, ami munisípiu Viqueqeu propoin alokasaun millaun $6.9 ne’ebé aprezenta ona ba Parlamentu Nasionál no iha semana kotuk halo ona audensia públiku ho ministériu Adiministrasaun Estatal (MAE). Hein katak bele hetan aprovasaun hosi Parlamentu Nasionál,” Januário Soares hateten ba jornalista Agência Tatoli, iha administrasaun munisípiu Viqueque, tersa ne’e.
Autoridade munisípiu Viqueqeu ne’e hatutan, hosi totál orsamentu ne’e hodi assegura desenvolvimentu rurais liu hosi konstrusaun estrada no pontes, eskola, postu saúde, postu administrativu no sede suku sira, saneamentu no atividade sosiál inkluzaun sira, inklui atividade Programa Mão-de-Obras Postu Administrativu (PMOPA), Programa Desenvolvimentu Integradu Munisipiu (PDIM) no atividade desportivas.
Kona-ba despesas alokasaun tuir programa administrasaun munisípiu Viqueque ho totál hamutuk $ 6,925,794. Orsamentu hirak ne’e aloka ba Estrada no Ponte ho totál $103,174, setór Desenvolvimento Rurál no Urbana ($ 1,069,210), setór Seguransa Nasionál ($63,959), no alokasaun ba asesu ba Justisa iha $46,715.
Parte seluk, alokasaun ba Boa Governasaun no jestasaun Institusionál hamutuk $2,812,210, setór agrikultura ($480,120), setór agua no saneamentu ($102,668), setór Saúde ($345,799), setór edukasaun no formasaun iha $1,799,924.
Nune’e mos alokasaun ba setór Igualdade Géneru no Inkluzaun Sosiál ho totál hamutuk $ 60,480 no alokasaun ba setór turismu iha $41,535.
Nune’e desagregasaun orsamentu ne’ebé aloka ba programa desenvolvimentu munisípiu ba programa PDIM hetan alokasaun orsamentu hamutuk millaun $1.1. Husi total ne’e kontribui de’it husi nível munisípiu rasik no nivel nasionál la-kontribui iha tinan ne’e.
Tuir projetu alokasaun ba programa PMOPA iha rihun $500 hodi realiza atividade sira iha nível postu tuir objetivu ne’ebe hatur ona.
Ba fali, projetu Programa Nasional Desenvolvimentu Suku (PNDS) hetan alokasaun hamutuk millaun $1.8. Iha períodu tinan 2023 sei aloka ba PNDS-Regular hamutuk tokon $1.8. Ba fali PNDS-RSS aloka rihun $52.0.
Parte seluk, ba fali Programa Uma Kb’it Laek (UKL) hetan alokasaun millaun $4.9. Hosi totál ne’e, implementa ba tipu UKL-regular hamutuk millaun $1.9, UKL-Plus A millaun $2.0 no UKL-Plus B rihun $976.7.
“Objetivu hosi programa ne’e hodi kria kondisaun ba komunidade sira kbi’it laek iha munisípiu Viqueque,” Autoridade munisípiu Viqueqeu nee dehan.
Programa Movimentu Hafoun Aldeia (PMOHA) hetan alokasaun hamutuk rihun $45.0. Program PMOHA ne’e realiza ba implementasaun atividade sira iha nível aldeia tuir objetivu ne’ebe hatur ona.
Jornalista: Vitorino Lopes da Costa
Editóra : Armandina Moniz
