VIQUEQUE, 19 outubru 2022 (TATOLI)— Administradór munisípiu Viqueque, Januário Soares ‘Bolly’, husu Parlamentu Nasionál (PN) atu aprova lalais lei finansa ba munisípiu sira. Tanba, liu husi lei ne’e munisípiu ida-idak bele ona jere rasik ninia orsamentu ba dezenvolvimentu.
“Ha’u husu Parlamentu Nasionál aprova ona lei finansa ba munisípiu sira, atu munisípiu bele ona jere rasik sira nian orsamentu, hodi benifísia ba programa ne’ebé munisípiu trasa. Tanba agora dadaun buat hotu nasionál maka jere no munisípiu la bele halo buat ruma”, Administradór Januário hateten ba jornalista Agência Tatoli, iha administrasaun munisípiu Viqueque, kuarta ne’e.
Autoridade lokal ne’e dehan agora dadaun munisípiu ezekuta orsamentu operasionál no planu hotu nasionál maka halo, no munisípiu akompaña ninia ejekuzaun no progresu sira deit.
“Tanba to’o agora ami seidauk ezekuta rasik orsamentu ida. Orsamentu ba kapitál dezenvolvimentu ami ezekuta de’it $500 mill mai kraik, sei liu ida-ne’e tama ba kategoria grande projetu,” nia haktuir.
Nia iha esperansa tinan ida-ne’e remata lei finansa munisipál bele hetan aprovasaun hosi Parlamentu Nasionál. Tanba, bainhira lei ne’e hetan aprovasaun munisípiu sira sei halo jestaun rasik ba ninia orsamentu.
“Ha’u espera lei finansa munisipál tinan ida-ne’e remata iha Parlamentu no bele hetan ona aprovasaun. Kuandu lei ne’e aprova ona signifika ba oin munisípiu iha ona orsamentu no la presiza hein nasionál,” nia dehan.
Nia mos dehan, lei finansa munisipál importante bainhira ko’alia kona-ba sentralizasaun poder hodi fó ba munisípiu hodi jere.
“Ha’u hanoin lei finansa laiha maka la bele apoiu ba programa dezentralizasaun ne’ebé sai importante teb-tebes. Lei finansa munisipál oras ne’e iha ona Parlamentu no hein katak fulan dezenbru ne’e bele hetan aprovasaun,” tenik nia
Jornalista: Vitorino Lopes da Costa
Editóra : Armandina Moniz
