DILI, 28 outubru 2022 (TATOLI)—Diretór Dirasaun Nasionál Transporte no Terrestre (DNTT), António da Costa, husu ba transporte públiku hanesan bus no anguna sira atu labele hasa’e tarifa iha loron finadu.
“Ha’u fó hanoin ba ita-nia motorista sira katak, ita moris iha nasaun ida ita hotu iha lei nia okos. Ne’ebé Estadu fó sai ona orden, lei no regulamentu favór boot ida la’o tuir lei ne’ebé ita-nia Estadu ka Governu fó sai ona. Maibé karik na’in hira mak sei viola hakarak ka lakohi ami tenke halo asaun. Asaun mak fó multa ba imi, hanesan minimu mak $100 no másimu $500. Maibé, se mak sira (mitorista) la rona ona hakarak ka lakohi plát no STNK ami tenke hasai,” António da Costa informa ba jornalista sira iha nia kna’ar fatin, Caicoli, Dili, sesta ne’e.
Tuir nia, iha 25 outubru foin daudaun ne’e DNTT forma ona ekipa ida hodi fó ona avizu ba terminál tolu, hanesan Becora, Taibesi no Tasi-Tolu.
“Objetivu, hosi ne’e atu ita prevene buat sira hasa’e tarifa ilegál. Hosi ne’e, ami fó hanoin ba komunidade para tenke brani ba buat ne’ebé imi sente ladi’ak, tenke brani ko’alia tanba imi kuandu la brani ami labele halo buat ida. Tanba ne’e, ha’u dehan kuandu sira (motorista) kobra (ilegál) favor boot ida tenke mai informa iha DNTT atu ami bele bolu sira hodi fó apreensaun ba sira,” nia apela.
Maske nune’e, ekipa ne’ebé DNTT forma atu prevene ba tarifa ilegál ne’e agora daudaun la’o hela iha terrenu.
“Iha horbainrua no horisehik mós sei la’o no segunda ami sei la’o nafatin,” nia afirma.
Tuir lei ne’ebé iha, ba tarifa transporte públiku hosi Dili ba Manatutu $2r, Dili ba Baucau $4, Dili ba Lospalos $8, Dili ba Viqueque $8, Dili ba Aileu $2, Dili ba Same $9, Dili ba Ainaro $8, Dili ba Suai $12, Dili ba Ermera $3, Dili ba Liquiça $2 no Dili ba Malina $6.
Jornalista : Nelia Fernandes
Editór : Cancio Ximenes
