DILI, 08 novembru 2022 (TATOLI)—Xefe Seksaun Seguransa Rodoviáriu iha Dirasaun Nasionál Transporte no Terrestre (DNTT, sigla-portugés ), Juvito José da Silva, informa DNTT normaliza ona semafóru ne’ebé durante avaria iha jardin Colmera Díli.
Notísia Relevante: https://tatoli.tl/2022/10/05/semaforu-avariadu-iha-colmera-dj-mtk-trata-hela-prosesu/
“Semafóru ne’ebé durante avaria iha jardin Colmera, ami normaliza ona iha fulan outubru nia laran,” Juvito José da Silva hateten ba Agência Tatoli via telefónika, tersa ne’e.
Semafóru ne’ebé avaria iha área Colmera, momentu ne’ebá tama iha prosesu kokursu maibé konkursu públiku ne’e Ministériu Transporte no Telekomunikasaun (MTK, sigla-portugés) halo demora, entaun nia parte hanesan Xefe Seksaun Seguransa Rodoviáriu nia labele nonok de’it ho ida ne’e, tanba iha komunidade barak mak mai hateten semafóru ne’ebé avaria iha área Colmera halo sira hetan asidente.
“Entaun, se ha’u hein prosesu konkursu ida-ne’e se nia sai tarde, entaun ita-nia komunidade barak sei hetan asidente iha ne’ebá. Ho ida-ne’e ha’u lori ha’u-nia kapasidade natón ho ha’u-nia funsionáriu sira, ami tuur hamutuk ko’alia no ami hetan solusaun. Entaun, ha’u ba solda fali nia kontroler ne’e halo di’ak no nia timer ne’e mak falla, hosi ne’e ha’u hasai tiha nia timer ne’e, ami ba monta fali, realidade nia di’ak fali ona,” nia esplika.
Tuir nia, semafóru ne’ebé daudaun normaliza ne’e tékniku DNTT la uza nia timer, tanba timer ne’e dadaun falla hela, no hosi ne’e agora daudaun kompañia Maslan mak manán konkursu, DNTT husu sira atu tau fali kontroler foun, atu nune’e semaforu ne’e bele hanesan uluk fali.
Jornalista : Nelia Fernandes
Editór : Cancio Ximenes
