BAUCAU, 21 novembru 2022 (TATOLI) – Governu liuhosi Ministériu Administrasaun Estatal (MAE) segunda ne’e, sensibiliza lei importante tolu ba kargu xefia sira iha munisípiu Baucau.
Diretór Unidade Administrasaun Téknika hosi Ministériu Admistrasaun Estatal (MAE), Lourenço de Araújo, esplika, objetivu hosi sensibilizasaun ne’e atu funsionáriu sira hatene no intende molok implementasaun podér lokál no desentralizasaun administrativa.
Notísia relevante: PN aprova projetu Lei Eleitorál Munisipál-Podér Lokál iha finál globál
“Antes atu implementa podér lokál pelumenus kargu diretór munisipál sira tenke intende no komprende lei sira-ne’e,” nia hateten iha Vila Nova, segunda ne’e.
Matéria ne’ebé hato’o iha sensibilizasaun ne’e kona-ba lei tolu; lei númeru 23/2021, loron 10 novembru kona-ba podér lokál no desentralizasaun administrativa, lei númeru 23/2021, loron 4 novembru kona-ba eleitorál munisipál no lei númeru 14/2021 ne’ebé hetan alterasaun daruak hosi lei númeru 11/2009 kona-ba divizaun administrativa territóriu.
MAE husu kargu xefia iha munisípiu bainhira rona buka kompriende no intende nune’e perparadu bainhira implementasaun podér lokál no desentralizasaun administrativa iha territóriu nasionál.
Prezidente Autoridade Munisipál (PAM) Baucau, Olivio ‘Bou-Lesa’ Freitas, hateten, atividade refere importante ba diretór sira atu hatene kona-ba enkuadramentu legál hotu ne’ebé aprova nune’e bele implementa tuir.
“Diretór sira tenke hatene nune’e bele implementa tuir lei, ita nasaun buat hotu tenke regula tuir lei la’ós tuir ita-nia hakarak,” Bou-Lesa hateten.
Sensibilizasaun lei refere sei remata iha loron tersa, 22 novembru ne’ebé partisipa hosi kargu diretór servisu munisipál, administradór postu administrativu, Komandante Polísia Nasionál Timor-Leste munisípiu Baucau purvolta hamutuk na’in 30-resin.
Notísia relevante: PN aprova proposta-lei divizaun adminsitrativa territóriu iha finál globál
Jornalista : Natalino Belo
Editór : Evaristo Soares Martins
