DILI, 16 dezembru 2022 (TATOLI)—Diresaun Servisu Edukasaun Munisípiu Aileu (DSEMA) submete tan estudante finalista hamutuk 69 hanesan mellór klasifikadu ba Ministériu Edukasaun Juventude no Desportu (MEJD) tanba foin ramata prosesu verfikasaun.
“Ita submete uluk dadus mellór klasifikadu hosi pasajen klase nian ba ministériu. Agora ita submete tan dadus estudante finalista hamutuk 69 hosi nível identifikadu,” Diretór Servisu Edukasaun Munisípiu Aileu, Carlito Pereira, informa ba Agência Tatoli, via telefónika, sesta ne’e.
Estudante hosi Aileu ne’ebé atu hetan bolsa méritu hosi MEJD kompostu hosi finalista ensinu báziku terseiru siklu 9o ano na’in-45, estudante nível ensinu sekundáriu jerál 12o ano na’in-21 no estudante ensinu sekundáriu tékniku vokasionál 12o ano na’in-tolu.
Notísia relevante: Estudante mellór klasifikadu 635 iha Aileu tama lista bolsa méritu
Ministériu prevee ona orsamentu ba apoiu prémiu estudante mellór klasifikadu iha bolsa méritu ho montante millaun $7,2, ne’ebé hosi orsamentu ne’e prevee $51.750 ba estudante finalista hosi nível rua, kompostu hosi estudante nível ensinu báziku terseiru siklu 9o ano ho totál orsamentu $33,750 hodi oferese ba estudante bolsa méritu primeiru klasifikasaun $1.000, segundu klasifikasaun $750 no terseiru klasifikasaun $500.
Ba estudante finalista nível ensinu sekundáriu jerál 12o ano hetan alokasaun orsamentu $15.750, enkuantu estudante finalista nível ensinu sekundáriu tékniku vokasionál 12o ano ho total alokasaun $2.250, ne’ebé sei apoiu prémiu bolsa méritu ba estudante primeiru klasifikasaun $1.000 segundu klasifikasaun $750 no terseiru klasifikasaun $500.
Ho nune’e, totál estudante mellór klasifikadu hosi Aileu ne’ebé tama iha kategoria bolsa méritu hamutuk 704, kompostu hosi estudante pasajen klase 635 no estudante finalista 69.
Jornalista : Tomé Amado
Editora : Julia Chatarina
