BAUCAU, 17 janeiru 2023 (TATOLI) – Kondisaun estrada iha aldeia Osouaque, suku Fatulia, postu administrativu Venilale grave nune’e difikulta komunidade transporta produtu ba merkadu.
Xefi suku Fatulia, Angelino Moisés Perreira, esplika, estrada refere antes ne’e hetan reabilitasaun hosi kompañia Rubic maibé atualmente paradu no seidauk iha kontinuasaun nune’e bainhira tempu udan difikulta komunidade atu halo movimentu.
“Difikulta tebes komunidade sira atu transporta produtu no viajen prezudika tebes tanba distánsia dook no kondisaun estrada aat,” Xefe suku Fatulia hateten iha Vila Nova, tersa ne’e.
Estrada refere ligasaun hosi suku Fatulia ba diresaun aldeia Osouaque to’o suku Uaimori, postu Ossu, munisípiu Viqueque purvolta kilÓmetru 27 ne’ebé konstrusaun hahú iha tinan 2015.
Autoridade Fatulia konsidera estrada importante ba komunidade tanba maioria moris nu’udar agrikultór nune’e bele transporta produtu ba merkadu hodi hadi’a ekonomia uma laran.
Suku Fatulia rasik maioria komunidade asesu ona liña elétrika tanba fulan-dezembru tinan 2022 governu inaugura ona, maibé sei hela uma-kain balun mak seidauk tanba distánsia hela dook hosi rin eletrisidade.
Maske nune’e, autoridade lokál Fatulia sei rekolla dadus hodi hatene totál uma-kain ne’ebé seidauk asesu eletrisidade submete ba EDTL hodi hetan ajuda solár painél iha tinan 2023 ne’e.
“Ami sei rekolla dadus bazea ba orientasaun hosi EDTL atu hetan ajuda solár painél ba komunidade ne’ebé seidauk asesu eletrisidade,” Angelino Perreira akresenta.
Suku Fatulia iha tótal populasaun hamutuk 2.903, uma-kain 701 kompostu hosi aldeia haat hanesan Bahadato, Uai-to-bono, Uatulia-ana no Osouaque.
Jornalista : Natalino Belo
Editór : Evaristo Soares Martins
