DILI, 02 Juñu 2026 (TATOLI)-Primeiru-Ministru, Xanana Gusmão, hato’o nia agradesimentu ba deputadu sira, tantu opozisaun no bankada apoiu Governu nian, tanba kontribui fó hanoin no apoiu durante debate no aprovasaun finál globál ba Orsamentu Retifikativu (OR).
Xanana hateten katak diskusaun ne’ebé la’o durante loron hirak iha Parlamentu Nasionál iha ambiente demokrátiku, ne’ebé parte hotu fó hanoin ba malu.
“Ami mós mai aprende buat barak husi deputadu sira, fó lembra katak atu halo buat ida karik tenke haree didi’ak. Ne’ebé ajuda malu duni, bolu mós atensaun ba ami kona-ba buat barak ne’ebé sei falta. Klaru ami la dehan katak ami halo hotu ona, maibé ami sei presiza haka’as-an nafatin atu hadi’a di’ak liután”, Xanana Gusmão hato’o iha Parlamentu hafoin aprovasaun finál globál ba Orsamentu Retifikativu.
Nia mós agradese ba bankada rua Governu nian ne’ebé fó tulun tomak no bainhira problema krize ne’e mosu “ita hakfodak tebes no ami sala karik, maibé ami buka dalan lais liu asegura no bele hetan kombustivel, bele asesu ba tempu la naruk liu, maibé tempu naruk uitoan”, dehan.
Ho situasaun sira ne’e hotu, maka Governu tenke mai atrapalla deputada sira-nia serbisu, no deputadu sira-nia devér atu monitoriza no fiskaliza Governu nia hahalok.
“Depoizde votasaun globál haree katak ita-boot sira hotu hamutuk idaidak fó hanoin ba malu oinsá mak lori rai ne’e. Ita hamutuk duni atu enfrenta krize ida-ne’e no bele asegura estabilidade sosiál uitoan, para tinan ida-ne’e ita bele haree malu nafatin. Obrigada barak ba ita hotu nia kompriensaun no ba hothotu nia apoiu ,embora abstensaun mós ne’e apoiu boot ida”, nia afirma.
Notísia relevante: Parlamentu aprova proposta Orsamentu Retifikafivu iha finál globál
Jornalista: Arminda Fonseca
Editora: Maria Auxiliadora
