DILI, 18 janeiru 2023 (TATOLI) – Governu aprova altersaun dahuluk ba Dekretu-Lei númeru 24/2021, loron 17 fulan-novembru, ne’ebé kria ona Ajénsia Nasionál Planeamentu, Monitorizasaun no Avaliasaun (ANAPMA), aprezentadu husi Primeiru-Ministru (PM), Taur Matan Ruak.
“Alterasaun ida-ne’e ninia objetivu mak atu ajusta ANAPMA ba nesesidade ne’ebé relasiona ho ninia jestaun finanseira no ho objetivu atu ninia estrutura interna sai fleksivel liután no hodi korresponde ba nesesidade sira dezenvolvimentu nian hosi prosesu sira planeamentu plurianuál nian ba prazu médiu no badak, nomós ba monitorizasaun no avaliasaun”, Ministru Prezidénsia Konsellu Ministru, Fidelis Magalhães, hateten iha Palásiu Governu.
Alterasaun ne’e permite mós atu fó apoiu tékniku efetivu ba Primeiru-Ministru, iha ninia kompeténsia ba fortalesimentu institusionál Estadu nian, no koordenasaun asaun nian hosi membru Governu oin-oin, liuliu atu konkretiza objetivu no meta sira ne’ebé prevee ona iha Programa Governu nian.
Nia haktuir ho alterasaun ne’e ANAPMA bele iha ninia konta rasik hodi jere sira-nian osan nomós loke dalan ba diretór-ezekutivu hodi bele kontrola maka’as liután ba jestaun instituisionál. “Loke mós dalan atu harii mekanizmu auditoria interna ANAPMA nian tanba ajénsia iha ona osan rasik, entaun tenki iha duni auditoria interna ida para bele halo jestaun no tau-matan ba orsamentu sira ne’ebé alokadu”.
Relembra katak Governu aprova antes ona dekretu-lei ne’ebé aprezenta hosi Xefe Ezekutivu, hodi kria ANAPMA, ne’ebé halakon Unidade Planeamentu, Monitorizasaun no Avaliasaun (UPMA), hanesan servisu sentrál ba administrasaun sentrál direta Estadu ho autonomia administrativa no finanseira.
Ajénsia ne’e dirije hosi diretor-ezekutivu ida, ne’ebé ierarkiamente subordina ba Xefe Governu no koadjuva hosi diretór adjuntu na’in-tolu, ne’ebé responsável ba área administrasaun no finansa, área planeamentu, inklui área monitorizasaun no avaliasaun.
Notísia relevante : https://tatoli.tl/2022/01/26/governu-nomea-ageu-jorge-cardoso-lidera-anapma/
Jornalista: Antónia Gusmão
Editora: Maria Auxiliadora
