DILI, 01 fevereiru 2023 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno ho ekipa aranka ona ba Jakarta, Indonézia hodi partisipa iha reunaun Ministru Negósiu Estranjeiru ASEAN nian ba dala-32.
Reuniaun nível rejionál ne’e sei hala’o durante loron tolu, hahú 07-09 fevereiru tinan ne’e no sei partisipa hosi nasaun membru hamutuk 11.
“Objetivu prinsipál hosi sorumutu refere atu promove dialógu konstrutivu no konsulta hodi fó kontribuisaun signifikativa ba esforsu sira atu hametin liután páz no seguransa ba interese nasionál, mutúa iha rejíaun azía no pasífiku”, Ministra Magno dehan liuhosi komunikadu ne’ebé Agência TATOLI asesu, ohin.
Iha okaziaun ne’e, Ministra Magno sei hala’o mós enkontru bilaterál ho nasaun membru ASEAN sira atu ko’alia kona-ba asuntu kooperasaun bilaterál ho Timor-Leste.
Nasaun membru 11 ne’e mak hanesan, Indonézia, Malazia, Myanmar, Thailandia, Laos, Vietname, Filipina, Kamboja, Singapura, Brunei Darusalam no Timor-Leste.
Hafoin partisipa enkontru iha Jakarta, Ministra ne’e, sei akompaña Primeiru-Ministru, Taur Matan Ruak nia vizita ofisiál ba Austrália hodi ko’alia kona-ba asuntu bilaterál no seluk tan.
Tuir ajenda ne’ebé iha, Xefe Governu aranka ba Australia iha segunda semana oin.
Jornalista: Hortencio Sanchez
Editór : Zezito Silva
