OÉ-CUSSE 02 fevereiru 2023 (TATOLI) – Autoridade Rejiaun Administrativa Espesiál Oé-cusse Ambeno (RAEOA), lideradu Arsénio Paixão Bano, presiza rezolusaun hosi Governu Sentrál hafoin halo pagamentu ba abitante ne’ebé sira-nia rai afetadu ba projetu Zona Espesiál ba Ekonomia Sosiál Merkadu (ZEESM).
Iha 2023 Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretariu Rejionál ba Asuntu Terra no Propriedade, prevee ona millaun $1.60 hosi Orsamentu Jerál Estadu (OJE) 2023 nian hodi prepara halo pagamentu ba abitante afetadu ne’ebé afeta hosi mega projetu ZEESM.
Sekretáriu Rejionál ba Asuntu Terra Proriedade, António Hermenegildo da Costa, informa, molok halo pagamentu ba komunidade afetadu sira iha Oé-Cusse, Autoridade RAEOA sei presiza rezolusaun ida hosi Governu Sentrál hanesan mata dalan ba pagamentu.
“Ami esforsa nafatin nune’e iha tinan ida-ne’e ita bele rezolve problema afetadu sira, orsamentu ita preparadu, hein de’it rezolusaun ida hosi Governu, tinan kotuk mós ami prevee tinan ne’e mós ami prevee nafatin, tinan kotuk ami seidauk halo pagamentu tanba prosedimentu legál atu halo pagamentu seidauk iha, ba tinan ne’e Terra Propriedade prevee tán millaun $1.60,” Sekretáriu Rejionál ba Asuntu Terra Proriedade, António Hermengildo da Costa, hatete iha Oé-Cusse, kinta ne’e.
Nia informa, iha semana kotuk Diresaun Terra propriedade enkontru ona ho Prezidente Autoridade, no rekomenda oinsá iha rezolusaun Governu ida hanesan dalan ba ida ba Terra Propriedade atu halo pagamentu ba rai afetadu sira.
Nune’e Autoridade iha esperansa iha tinan ne’e, problema ba rai afeitadu ba alargamentu estrada no mós mega projetu seluk bele rezolve ona.
“Ita sei atende iha tinan ne’e, konforme rezolusaun Governu ne’e iha, depois bazea ba ida-ne’e Autoridade mós sei prepara deliberasaun ida hodi reforsa tán ba prosesu pagamentu nian, iha primeiru trimestrál seidauk maibé karik iha trimestre datolu to’o haat ita bele halo ona, depende ba rezolusaun Governu,” nia afirma.
Tuir nia, rezolusaun Governu ne’e hanesan baze legál, atu hatete, sé mak bele hetan indemnizasaun, sé mak merese atu hetan indemnizasuan ba rai, plantasaun ho tipu saida produtiva ka valór ekonómia ka lae, rai metru kuadradu sei hetan hira.
Nune’e mós iha deliberasaun ne’e atu hatete hosi diresaun ne’ebé to’o iha ne’ebé, tanba rezolusaun Governu ida-ne’e fó mai Oé-Cusse, implementa de’it iha RAEAOA la utiliza ba munisipíu seluk.
Alende ne’e mós momentu rezolusaun ida, Governu Sentrál entrega ba iha munisipíu Covalima, maibé sei la implementa iha Oé-Cusse, ne’ebé rezolusaun ne’e la hanesan.
Nune’e kona-bá dadus afetadu iha Oé-Cusse parte Diresaun Terra Propriedade seidauk fó-sai, maibé dezde afetadu anteriór to’o alargamentu estrada nasionál Pante Makasar to’o Nítibe rejista ona.
“Ita hein de’it rezolusaun Governu nian karik aprova ona, Autoridade mós sei prepara rezolusaun ida, maka ita foin halo pagamentu,” nia katak.
Jornalista : Abílio Elo Nini
Editór : Evaristo Soares Martins
