DILI, 16 Juñu 2026 (TATOLI)—Autoridade Polísia Nasionál Timor-Leste (PNTL) Munisípiu Ainaru liuhusi operasaun konjunta, konsege identifika ona suspeita ida ho inisiál AMCS, ne’ebé soe nia bebe rasik iha área Bairu Cina Uma, Aldeia Maubisse Vila, Suku Maubisse, Postu Administrativu Maubisse, Munisípiu Ainaru.
Komandante PNTL Munisípiu Ainaru, Superintendente Xefe Emélio dos Santos, informa, membru seguransa sira konsege identifika suspeita ho idade 18 hafoin komunidade lokál deskobre bebe nia isin-mate iha loron Domingu (14/06), iha tuku 07:00 dadeer, ho kondisaun parte isin balun asu han ona.
“Ekipa Polísia bá fatin akontesimentu hodi asegura evidénsia no transporta kedas bebe nia isin-mate ba Mortuáriu Ospitál Referál Maubisse atu submete ba prosesu autópsia,” Emélio dos Santos, hato’o iha nia knaar fatin, Tersa ne’e.
Notísia relevante : PNTL asegura ona sidadaun feto ida soe bebe iha Fatuhada
Hafoin halo koordenasaun entre Eskuadra Polísia Maubisse ho Komandu Munisípiu, forsa konjunta realiza operasaun hodi buka tuir suspeita.
Nune’e, iha loron 15 Juñu, Autoridade sira konsege lokaliza AMCS ne’ebé durante ne’e hala’o hela tratamentu saúde iha Ospitál Referál Maubisse.
Rezultadu husi investigasaun inisiál konfirma katak AMCS hanesan inan biolójika husi bebe.
“Hafoin halo prosesu identifikasaun no rekolla informasaun preliminár, autoridade sira lori suspeitu bá Komandu PNTL Munisípiu Ainaru atu kumpre prosedimentu legál sira,” nia katak.
Maski suspeitu fila ona bá nia hela-fatin, maibé nia sei nafatin iha observasaun no kontrolu restritu husi autoridade kompetente sira, enkuantu hein Tribunál nia desizaun husi tuir lei ne’ebé vigora.
PNTL daudaun ne’e kontinua hala’o investigasaun kle’an hodi buka faktu hotu relasiona ho kazu ne’e hodi garante katak prosesu justisa bele la’o di’ak.
Jornalista : Natalino Costa
Editora : Julia Chatarina
