DÍLI, 14 fevereiru 2022 (TATOLI) – Diretór Jerál Servisu Rejistu Notariadu (DJRN), João Fernando Martins Borges, dehan parte aprovizionamentu Ministériu Justisa (MJ), kontrata ona empreza Thales ho Visi Mitra ho objetivu atu prodúz kaderneta passaporte.
“Hosi parte aprovizionamentu Ministériu Justisa nian kontrata ona kompañia Thales hamutuk (join venture) ho Visi Mitra hosi Indonézia hodi halo produsaun ba kaderneta passaporte Timor-Leste. Ita kontratu kompañia sira ne’e ho durasaun tinan rua”, Diretór Jerál DGSRN ), João Fernando Martins, hateten ba jornalista sira iha kna’ar fatin Colmera, tersa ne’e.
Empreza rua ne’e nu’udar rekomendasaun hosi International Civil Avetion Organization (ICAO), tanba kompañia rua ne’e prodúz kaderneta passaporte ho kualidade ho nível internasionál tuir ICAO nian.
“Ita bo’ot sira hatene katak daudaun ne’e, passaporte Timor-Leste iha ranking dahaat iha Asía tuir ICAO. Entaun ita presiza haree didi’ak ida ne’e atu mantein nia kualidade ida ne’e. Ita mós sei koalia ho kompañia atu mantein kualidade ida ne’e, atu ita-nia passaporte nia kualidade labele monu iha mundu internasionál“, nia revela.
Iha tinan kotuk MJ loke konkursu maibé tanba laiha kompañia mak interesezadu atu konkore, tanba ba produzaun kadernerta passaporte ne’e ho tipu ajudikasaun direita ne’ebé mai ho kritériu barak atu laiha kompañia ida konkore.
“Ita bo’ot sira hatene katak passaporte la’os sasan bain-bain, la’os hanesan produsaun BI, la’os sertidaun moris, maibé pasaporte nia rekezitu sira ne’e rigorozu oituan, entaun laiha kompañia ida maka hetan iha tinan kotuk hodi lori ita mai to’o tinan ida ne’e”, nia espika.
Nia rekorda, iha 2020, 2021 no 2022 bainhira estoke kaderneta passaporte hahú laiha, DJSRN hahú alerta no husu ona aprovizionamentu Ministériu Justisa atu haree problema ida ne’e, maibé laiha kompañia mak atu konkore to’o mai ohin loron.
Diretór Jerál Servisu Rejistu Notariadu (DJRN), João Fernando Martins Borges, hateten laiha data fixu bainhira los mak kompañia ne’e bele finaliza produsaun ba kaderneta passaporte, tanba tuir previzaun ne’ebé mak iha, produsaun kaderneta passaporte sei lori fulan tolu to’o fulan neen.
“Ita laiha serteza no ha’u laiha data fixu ba ida ne’e atu koalia bainhra mak kompañia hatama kaderneta passaporte mai, tanba ida ne’e bele lori fulan tolu to’o neen atu kompañia bele konklui produsaun kaderneta passaporte ne’e mak espetativa ne’ebé ita iha”, nia afirma.
Nia dehan, sé kuandu kompañia hatama fila fali karderneta passaporte mai DGSRN sei halo fila fali atendimentu passaporte komum hanesan bainbain.
“Kuadu buat hotuhotu iha ona, ami sei halo fila atendimentu bainbain”, nia refere.
Diretór Jerál Notariadu ne’e hateten MJ komunika ona kompañia hodi aselera produsaun passaporte.
“Ami mós iha ona kontatu ho empreza ne’e no husu sira atu aselera prosesu produsaun kaderneta passaporte. Ministru Justisa mós informadu ba asuntu ne’e, Ministru Justisa rasik buka hela dalan oinsa husu kompania atu bele prodúz lalais kaderneta no hatama lalais mai hodi halo fali atendeimentu ba passaporte dentru posibilidade ne’ebe mak iha”, nia dehan.
“Konsertaza situasaun ida ne’e prejudika tebes ita, horseik de’it ita simu ona lamentasaun 10 hosi ita nia joven sira ne’ebé mai halo atendimentu passaporte komun atu ba rai li’ur. Ami hatan preukupasaun ne’e katak ita nia estoke kaderneta passaporte komum hela oituan” João Fernando Martins hakotu.
Jornalista: Natalino Costa
Editór : Zezito Silva
