BOBONARO, 20 fevereiru 2023 (TATOLI) – Komisaun Nasionál Eleisaun (CNE, sigla portugés) iha munisípiu Bobonaro, segunda ne’e fó-sau ofisiál supervizaun eleisaun na’in-211 pasa hosi teste eskrita ba teste orál ne’ebé mak sei realiza hahú hosi 22 to’o 25 fulan-fevereiru.
Diretór CNE Munisípiu Bobonaro, Juvito Ramos, esplika kandidatu ne’ebé pasa hosi totál aplikante na’in-277.
Notísia relevante: STAE-CNE Bobonaro diskute preparasaun eleisaun volta daruak
“Ami halo korresaun ba sira-nia rezultadu ne’e, sira-ne’ebé mak pasa ne’e hamutuk 129 ba mane no 82 ba feto hamutuk 211 mak pasa ba teste orál no 66 mak la pasa iha teste eskrita ne’e,” nia informa ba jornalista sira, iha SoSo, Maliana.
Ho rezultadu ne’e, nia husu ba kandidatu sira atu prepara-aan, estuda didi’ak nune’e bele hatudu rezultadu di’ak iha faze tuir mai.
“Kandidatu sira-ne’ebé pasa ba teste orál ne’e, tenke bele lee barak, estuda barak, liuliu kona-bá ita-nia prosesu eleitorál tanba pergunta ne’e sei fó iha teste ne’e maioria mak hosi prosesu eleitorál,” nia katak.
Nia haktuir, hafoin halo teste orál kandidatu admitidu sira sei koloka kada estásaun votu ne’ebé mak Seketariadu Tékniku Administrasaun Eleitorál (STAE), munisípiu Bobonaro estabelese iha suku 50, postu administrativu neen.
“Sira-ne’ebé presiza ne’e mak agora daudaun ami seidauk bele esklarese iha-ne’e tanba sentru votasaun no estasaun votu ne’e seidauk publika iha Jornál Repúblika, totál sentru votasaun hirak mak aprova no estasaun votu hira mak aprova,” nia hateten.
Sorin seluk kandidatu ofisiál supervizaun, Sidonio Nunes, sente kontente bele pasa iha faze ida ne’e maske foin primeira vez aplika vaga refere.
“Ezame tuir mai ne’e ha’u sei halo preparasaun másimu no estuda maka’as, atubele liu iha vaga ida-ne’e,” nia dehan.
Enkuantu bainhira asina ona kontratu ho CNE, ofisiál hirak ne’e sei halo atividade ka knaar prinsipál mak hanesan halo supervizaun ba atividade prossesu edukasaun votante, kampaña eleitorál, eleisaun parlamentár to’o apuramentu munisipál.
Notísia relevante: STAE-CNE Bobonaro diskute preparasaun eleisaun volta daruak
Jornálista : Sérgio da Cruz
Editór : Evaristo Soares Martins
