DILI, 07 marsu 2023 (TATOLI) – Xefe Sentru Saúde Formoza Jaime do Reis, dehan iha janeiru no fevereiru, moras ne’ebé rejista aas mak Infensaun Vias Respiratóriu Aguda (ISPA) hamutuk 3.554
“Ita rejista moras ne’ebé aas mak ISPA, iha janeiru ita rejista hamutuk 1.942 no fevereiru 1.602 ne’ebé afeta ba labarik no mós ema boot sira”, Xefe Sentru Saúde Formoza Jaime do Reis, dehan iha nia kna’ar fatin formoza, ohin.
Nia informa, moras ISPA nia kauza mosu husi mudansa klimátika hanesan tempu udan depois bailoron. Ida ne’e provoka rai rahun maka’as entaun afeta ba populasaun sira atu hetan moras ida ne’e.
Atu halo prevensaun ba moras ISPA mak parte saúde nafatin halo promosaun saúde ba komunidade sira atu moris ho ijiéne ne’ebé mak di’ak.
“Sentru Saúde Formoza rejista mós moras moras diárea husi janeiru to’o fevereiru hamutuk 609, moras kulit 190, dermatitis 254, scabies 33, pneumonia 57, konjutivitis 70 no moras sira seluk hamutuk 2.279.
Entretantu, medikamentu no fasilidade sufisiente hodi halo tratamentu ba moras sira ne’e iha Sentru Saúde formoza.
Jornalista : Felicidade Ximenes
Editór : Zezito Silva
