BAUCAU, 10 marsu 2023 (TATOLI) – Komandu Polísia Nasionál Timor-Leste (PNTL) munisípiu Baucau, sesta ne’e, realiza treinamentu ka simulasaun atu prevene konflitu balun ne’ebé afeta ba ordem públiku ho forsa.
Segundu Komandante PNTL munisípiu Baucau, Superintendente Asistente José Casmiro de Carvalho, hateten simulasaun refere parte hosi atividade formasaun kona-ba uza forsa bainhira iha konflitu ruma ne’ebé afeta ba estabilidade ordem públiku.
Simulasaun durante loron lima ne’e partisipa hosi membru Sesaun Rezerva Intervensaun Rápida no membru sira hosi Eskuadra postu administrativu neen iha Baucau.
“Objetivu atu hatudu serbisu realidade loloos durante formasaun loron-lima iha terenu, la’os teoria deit, maibe pratika hotu,” Segundu komandante PNTL Baucau hateten iha Vila nova, sesta ne’e.
Simulasaun refere fahé ba parte haat hanesan tekniku halo kapturasaun ba grupu rua ne’ebé halo problema, tekniku patrollamentu unidade hasoru atake hosi grupu kriminozu sira, atua joven sira ne’ebé kondisaun lanu iha fatin publiku no asegura bainaka VVIP bainhira hasoru problema.
PNTL Baucau iha esperansa liuhosi formasaun no simulasaun refere membru hosi sesaun task force bele halo serbisu iha terenu di’ak liutan.
“Konserteza bainhira uza forsa sufisiente ona ba sira, la’os foun maibe fó hanoin nafatin tekniku atuasaun iha fatin publiku,” Superintendenti asistente José Carvalho akresenta.
Objetivu seluk hosi treinamentu refere tuir oreintasaun hosi komando jerál PNTL nu’udar parte preparasaun hasoru eleisaun parlamentár ne’ebé sei realiza iha fulan-maiu tinan-ne’e no parte hosi dever hosi PNTL nian hodi atua problema iha terenu.
Tótal membru ne’ebé partisipa iha treinamentu refere nain-35, kompostu seksaun forsa rezerva hanesan inklui delegasaun hosi kada eskuadra postu admistrativu na’in-rua.
Treinamentu refere halao durante loron-lima hahú iha loron-segunda to’o ohin ne’ebé formador hosi treinador Prátika manutensaun ordem públika (MOP) sentro formação Polísia (CFP), Unidade Especial Polícia (UEP) nomos husi Komando Munisipiu Baucau rasik.
Jornalista : Natalino Belo
Editór : Florencio Miranda Ximenes
