DILI, 29 marsu 2023 (TATOLI) – Timor-Leste ho Japaun kontinua hametin kooperasaun iha programa Japan-East Asia Network of Exchange for Students and Youths (JENESYS) hodi fasilita joven timoroan sira ba vizita Japaun.
“Programa ne’e hanesan, programa interkambiu ida entre joven Timor-Leste ho Japaun, ami konvida timoroan sira atu ba aprende buat ruma iha ne’ebá kona-ba klutura no servisu hotu iha Japaun,” Embaxadór Japaun iha Timor-Leste Tetsuya Kimura, hateten, foin lalais ne’e.
Diplomata japonés ne’e afirma, Programa JENESYS iha objetivu rua mak hanesan primeiru timoroan sira bele aprende buat ruma iha Japaun atu fila fali mai atu implementa iha Timor-Leste, segundu sira bele sai ponte komunikasaun Japaun ho Timor-Leste iha futuru.
Programa ne’e Japaun loke iha tinan 2009 timoroan hamutuk na’in 1700 mak sai benefisiariu ba programa ne’e.
“Hosi tinan 2009 to’o agora ami konvida ona timoroan hamutuk ema na’in-1700 mak ba vizita ona Japaun atu hare kona-ba servisu importante sira ne’ebé mak ema Japaun sira halo, hanesan área seguransa, fabrika, peska no seluk tan,” nia relata.
Nia hatutan, iha tinan kotuk tanba situasaun Covid-19 joven timoroan hamutuk na’in-180 mak asesu ba programa ne’e maibé ba tinan ida ne’e sira loke fali ona ba públiku atu bele ba konkorre hodi partisipa iha programa ne’e ho númeru ne’ebé bele liuhosi 200 ba leten.
Programa ne’e Japaun estabelese kompleta ona tinan 50 estabelesimentu entre Japaun no nasaun sira iha ASEAN.
Timor-Leste daudaun ne’e hanesan observadór ASEAN, Japaun nafatin hametin kooperasaun ba programa ne’e ho Timor-Leste sira hodi fasilita joven timoroan sira atu ba observa servisu saida de’it mak Japaun halo hodi bele implementa fali iha Timor-Leste.
Jornalista : Hortencio Sanchez
Editór : Rafael Ximenes de A. Belo
