MALIANA, 29 marsu 2023 (TATOLI) – Ministériu Administrasaun estatál (MAE) liuhosi Diresaun Nasionál Apoiu Administrasaun Suku no Unidade Informátika (IT), kuarta ne’e fó formasaun ba Pesoál Apoiu Administrasaun Suku (PAAS) no xefe suku hamutuk 50 iha munisípiu Bobonaro atubele utiliza programa Sistema Integradu Imformasaun Jestaun Dadus Suku no Aldeia (SIIGDSA, sigla portugés).
Xefe depratamentu DNAAS, Jony Ricardo da Costa, esplika, sistema SIIGDAS ne’e atu moderniza sistema prenximentu livru administrasaun suku ne’ebé mak durante ne’e PAAS sira atualiza hela ho sistema manuál.
Notísia relevante: Xefe suku Holsa ezije MJ rezolve problema kaderneta pasaporte
“Sira halo prenximentu iha livru 18 ne’ebé mak sira atualiza iha livru administrasaun suku ne’e ho sistema manuál, maibé agora ita dijitaliza fali ho sitema ne’ebé naran Sistema Integradu Imformasaun Jestaun Dadus Suku no Aldeia,” nia ko’alia iha salaun administrasaun munisipál Bobonaro.
Formasaun ne’e rasik hala’o durante loron-haat, hahú hosi loron-kuarta to’o sesta, foka liu matéria sira-ne’ebé liga liu bá sistema SIIGDSA ne’e rasik, mai hosi prenximentu livru tolu ne’ebé presiza autualiza mak hanesan; dezemvolvimentu, administrasaun públiku no livru administrasaun populasaun.
“Iha pontu tolu ne’e maka DNAAS ho IT hakarak atu fahe informasaun, aprezenta matéria sira-ne’e ba PAAS no xefe suku sira ho nia baze mak diploma ministeriál númeru 49/2017,” Jony esplika.
Xefe suku Holsa, postu administrativu Maliana, munisípiu Bobonaro, António Santa Cruz, agradese ba Governu tanba ho sistema ne’e bele fasilita ona serbisu administrasaun suku.
“Ho formasaun ida-ne’e oinsá ami bele prodús ka transfere dadus populasaun ne’ebé mak iha suku liga ho nasionál, maibé ami lideransa ladún satisfaz tanba haree ba tempu mandatu ne’ebé mak lideransa komunitáriu 2016 besik remata mak governu foin kria sistema ida-ne’e,” Santa Cruz dehan.
Enkuantu formasaun ne’e fahe ba grupu rua ne’ebé grupu ida iha salaun administrasaun munisipál Bobonaro mai hosi postu administrativu Atabae, Balibo, Maliana no Cailaco ho totál suku 25. Grupu ida iha salaun administrasaun postu Bobonaro ho totál suku 25 mai hosi postu administrativu Bobonaro no Lolotoe.
Notísia relevante: MAE atribui materiál eletróniku ba suku hotu
Jornalista : Sérgio da Cruz
Editór : Evaristo Soares Martins
