ERMERA, HEADLINE, POLÍTIKA

MAE atribui materiál eletróniku ba suku hotu

MAE atribui materiál eletróniku ba suku hotu

Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 29 marsu 2022 (TATOLI) – Ministériu Administrasaun Estatál (MAE), atribui ona ekipamentu eletróniku ba suku 452 iha territóriu nasionál hodi fasilita xefe suku sira atu halo servisu diak liutan.

“Materiál eletróniku hanesan komputadór ida, mákina imprime ida no Uninterruptible power supply (UPS-sigla inglés) ida. Sasan eletróniku hirak ne´e atu ajuda hadi’a funsionamentu ba administrasaun suku hodi tau-matan ba interesse públiku nian”, Ministru MAE, Miguel Pereira de Carvalho, relata luhosi komunikadu ne’ebé Agência TATOLI asesu, ohin.

MAE refere, distribuisaun materiál hahú hosi Munisípiu Ermera no sei kontinua ba munisípiu seluk inklui Ataúro no Rejiaun Administrativa Espesiál Oé-cusse Ambeno (RAEOA).

Tuir planu, distribuisaun tuir mai sei realiza iha Munisípiu Baucau, Dili no munisípiu sira seluk no sei konklui iha abríl 2022.

Aleinde ida-ne’e, Miguel hateten Governu mós halo ona reabilitasaun ba sede suku hamutuk 400 iha territóriu nasionál no restu (52) sei reabilita iha tinan 2023.

“Hau hakarak dehan ba xefe suku hotu katak obrigasaun no dever Governu nian mak fasilita suku sira ho meiu rekursu ne’ebé adekuadu nune’e suku bele ezerse sira-nia atribuisaun tuir Lei Suco, Lei nú 9/2016 hodi nune’e bele tau-matan ba povu nia moris”, revela.

Ho atribuisaun ekipamentu hirak-ne’e, MAE apela ba xefe suku sira hotu no membru Konsellu Suku nian atu kolabora ho adminitrasaun lokál Estadu no Administrasaun Sentrál hodi tau-matan ba interesse públiku no komunidade nian iha suku sira.

Iha serimónia atribuisaun ne’e, MAE mós lansa plataforma informátika Sistema Integrado Gestão Administrasaun Sucos (SIGAS) ho nia objetivu atu rejista livru suku sira iha forma eletrónika no ONLINE.

Jornalista: Osória Marques

Editór : Zezito Silva

iklan
iklan

Leave a Reply

iklan
error: Content is protected !!