MACADIQUE, 30 marsu 2023 (TATOLI)- Problema sosiál sira hanesan estrada, bee-moos, eletrisidade, saúde, edukasaun, agrikultura no mós kriasaun empregu ba juventude no problema sosiál seluktan, sai preokupasaun komunidade Suku Macadique, Postu Administrativu Uatu-Lari, Munisípiu Viqueque.
Abitante lokál, Eduardo Amaral preokupa ho estrada ligasaun ba Uatu-Lari nia kondisaun la dun di’ak, difikulta komunidade lori produtu ba munisípiu no mós nasionál. Nune’e mós, nia preokupa ho juventude sira ikus-ikus ne’e sai ba rai-li’ur tanba ne’e nia husu governu atu uza osan Estadu ne’ebe iha hodi halo investimentu nune’e kria empregu ba joven sira.
“Governu mak halo programa sira hodi dezenvolve suku sira no tau-matan ba ema ne’ebe kbiit laek tanba ne’e ami husu atu governu haree didi’ak programa sira ne’ebé hala’o, hakarak husu hadi’a ami-nia estrada, ami atu halo natar, irigasaun tinan rua ona la diak”.
“Ami mós preokupa dala barak dehan Timór osan barak maibé tanba saida mak la uza osan ba loke investimentu nune’e joven sira bele servisu duke tinan ba tinan Governu haruka hotu joven sira ba rai liur” abitante lokál iha ámbitu dialógu komunitáriu iha suku Macadique.
Notísia relevante:Dialógu Komunitáriu, divulga informasaun Governu no rona povu nia preokupasaun
Abitante sira mós preokupa kona-ba programa husi Ministériu Justisa liuhusi Diresaun Nasionál Rejistu no Notariadu (DNRN) ne’ebé iha fulan outobru tinan 2022 kotuk halo iha Uatu-Lari hodi produz Billete Identidade maibé la konsege kobre tanba semana ida deit iha Uatu-lari nune’e komunidade la konsege trata hotu sira-nia dokumentu. Tanba ne’e, komunidade husu atu kontinua nafatin programa refere ba postu Administrativu Uatu-Lari.
Preokupasaun seluk, joven sira husu MAPKOMS atu estabelese mós sentru informasaun suku hodi fasilita informasaun ba komunidade sira.
Hatan ba preokupasaun hirak ne’e Ministru Asuntu Parlamentár no Komunikasaun Sosiál, Francisco Jerónimo, hateten, Governu anota preokupasaun hirak ne’e no sei kontinua informa asuntu komunidade sira relata liuhusi Konsellu Ministru ba ministériu relevante nune’e bele toma atensaun.
“Ha’u kontente tebtebes tanba dialógu ho komunidade Macadique ativa los espresa sira-nia hanoin no hakarak sira husu atu governu rezolve problema ne’ebé mak sira sente lorloron liu-liu relasiona ho estrada, bee-moos, eskola, saúde, eletrisidade, irigasaun. Ita rona ona no toma nota no sei hato’o ba ministériu responsável hotu oinsá buka solusaun ba solusiona problema sosiál hirak ne’e,” governante ne’e garante.
Entretantu, partisipa iha dialógu komunitáriu ne’e mai husi Ministru Asuntu Parlamentar no Komunikasaun Sosiál, Diretór jerál Ministériu Saúde, reprezentante administradór Munisipiu, Autoridade Lokál no komunidade husi Aldeia 21 iha suku Macadique nune’e mós komunidade balun mai husi suku hirak ne’ebé pertense ba postu Administrativu Uatu-Lari nian.
Jornalista : Anito Soares
Editór : Rafael Ximenes de A. Belo
