Atauro, 13 abril 2023 (TATOLI) – Komunidade Uaro-ana Atauro oferese rai ba Ministériu Saúde (MS) atu harii Postu Saúde iha Suku Biqueli, Postu Administrativu Atauro Villa, Munisípiu Atauro.
”Ha’u reprezenta komunidade iha Aldeia Uaro-ana, Suku Bikeli oferese rai diretamente ba Ministériu Saúde atu harii Postu Saúde ba ami-nia komunidade ida ne’e”, nain ba rai João Camilo dehan iha bairo akrema Atauro, ohin.
Nia hateten, durante ne’e komunidade iha aldeia Uaro-ana tenke lao ain ho kilometru haat mai Atauro Villa hodi halo tratamentu saúde entaun ho ida ne’e mak oferese rai ba MS atu harii Postu Saúde ne’ebé besik ba komunidade sira.
”Ami oferese rai ba MS ne’e ho medida 100×100 metru hodi harii Postu Saúde ba komunidade ida ne’e”, João Camilo informa.
Iha fatin hanesan, Ministra Saúde Odete Maria Freitas Belo, agradese ba komunidade Uaro-ana ne’ebé oferese rai atu harii Postu Saúde ba komunidade sira atu halo atendimentu ne’ebé besik ba sira.
”Ita bo’ot sira oferese rai ba ami liuhosi señor João Camilo ho objetivu atu harii Postu Saúde atu halo atendimentu besik liubá ita boot sira, tanba banhira ami atu harii Postu Saúde ida tenke haree ba númeru populasaun ne’ebé mak liu 500, maibé ami haree katak komunidade iha Aldeia Uaro-ana ne’e dook husi Atauro vila, entaun ho ida ne’e mak ami mós hakarak harii Postu Saúde ida ne’e hodi sira bele halo atendimentu saúde besik ba sira”, Odete revela.
Suku Bikeli iha aldeia haat hanesan Aldeia Ilicnamo, IliduaDouro, Uaro-ana no Pala.
Jornalista : Felicidade Ximenes
Editór : Zezito Silva
