VIQUEQUE, 28 abríl 2023 (TATOLI)—Polísia Nasionál Timor Leste (PNTL) Viqueque identifika ona autór ba konfrontu iha aldeia Dasuwate, suku Afaloikai, postu administrativu Uatolari, munisípiu Viqueque, iha loron kinta (27/04) maizumenus tuku 16:45.
“Kampaña horiseik, partidu FRETILIN hala’o ninia kampaña iha postu Uatolari, akontese problema ida iha ne’ebá, maibé ita haree parte seguransa metin, PNTL halo kolaborasaun ho F-FDTL. Buat balun akontese bainhira militante partidu FRETILIN halo konvoi ho karreta, ema balun ne’ebé falta konsiénsia tuda fatuk hodi rezulta uma balun hetan estragu no ema na’in-rua hetan tuda. Ami parte seguransa identifika ona hodi halo prosesu kontinuasaun no aprezenta ba Ministériu Públiku,” Komandante PNTL Viqueque, Supertendente Sebastião Alves Quintão.
Notísia relevante: Konfrontu iha Uatolari rezulta uma hitu hetan estragu no vítima 16
Komandante PNTL haktuir, parte Polísia identifika ona suspeitu sira horikalan maibé seidauk identifika hotu, maibé ohin PNTL sei bolu filafali ema ne’ebé identifika ona atu kontinua prosesu identifikasaun.
“PNTL sei halo koordanasaun ho parte relevante kona-ba kazu refere. Kona-ba suspeitu ami identifika lubuk ida maibé ha’u seidauk fó sai na’in hira maka sai suspeitu loloos tanba kazu ne’e sei iha prosesu identifikasaun. Atu ita bele hatene loloos sé mak sai hanesan suspeitu no sé maka sai hanesan vítima loloos. Ami autoridade seguransa serbisu neutru atubele haree ninia prosesu sira ne’e atu todan ka kama’an Tribunál maka iha kompeténsia hodi deside,” nia akresenta.
Konfrontu mosu tanba provokasaun maibé tuir observasaun no informasaun ne’ebé PNTL rekolla katak provokasaun ne’e mai husi militante ho simpatizante sira ne’ebé partisipa kampaña.
“Tanba ne’e ha’u seidauk fó kulpa ba ema ida tuir lei hateten, maibé serbisu la’o nafatin hodi halo identifikasaun. Ami nafatin mantein seguransa hodi asegura ninia prosesu atu aprezenta ba Ministériu Públiku,” nia dehan.
Daudaun ne’e situasaun atuál iha postu Uatolari la’o normál no parte PNTL no F-FDTL kontinua matein seguransa.
Jornalista : Vitorino Lopes da Costa
Editora : Julia Chatarina
