iklan

HEADLINE, SEGURANSA

Konfrontu iha Uatolari rezulta uma hitu hetan estragu no vítima 16

Konfrontu iha Uatolari rezulta uma hitu hetan estragu no vítima 16

Portavós Komandu PNTL, Superintendente Xefe Polísia, Arnaldo Araújo. Imajen Tatoli/Francisco Sony.

DILI, 28 abríl 2023 (TATOLI)–Komandu Polísia Nasionál Timor-Leste (PNTL), deklara, konfrontu iha loron 27 abríl 2023, iha aldeia Dasuwate, suku Afaloikai, postu administrativu Uatolari, munisípiu Viqueque rezulta komunidade nia uma hamutuk hitu mak hetan estragu no vítima na’in 16 maski la grave liu.

“Atu informa katak, iha loron 27 abríl militante hosi partidu balun fila hosi fatin kampaña, hetan tuda hosi komunidade balun iha postu administrativu Uatolari. Akontesementu ne’e rezulta ema balun kanek no komunidade nia uma hetan estragu. Relatóriu detalladu Komandu PNTL seidauk simu hosi Komandu Munisípiu,” Portavós Komandu PNTL, Superintendente Xefe Polísia, Arnaldo Araújo hateten liuhosi konferénsia imprensa iha Komandu PNTL, Caicoli, sesta ne’e.

Notísia relevante : Konfrontu iha Manleuana PNTL asegura joven na’in haat

Nia haktuir, biban ne’e komunidade ba Eskuadra Polísia Uatolari hodi husu urjentemente rezolve problema maibé tanba hetan apoia hosi membru FALINTIL-Forsa Defeza Timor-Leste (F-FDTL), nune’e komunidade idaidak filafali ba sira-nia hela fatin ho di’ak.

“Momentu ne’ebá ema barak, tanba ne’e atu identifika autór loloos daudaun Polísia nafatin rekolla informasaun atu nune’e hatene loloos sé mak envolve iha insidente ne’e. Loos duni katak ho akontesementu ne’e rezulta uma populasaun hitu mak hetan estragu. Kona-ba abitante balun hetan kanek, Polísia ajuda hodi lori ba sentru saúde hodi hetan tratamentu saúde,” nia esplika.

Nune’e, PNTL husu ba militante hotu atu respeita regra kampaña nian. Tanba iha kampaña ne’e halibur ema barak no halo provasaun tuir dalan.

“Entaun ema idaidak mak tenke atensaun no seguransa ba idaidak ninia-an. Maski nune’e PNTL monta postu seguransa iha fatin sira ne’ebé identifikadu hanesan risku ba konfrontu,” Portavós tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!