DILI, 08 marsu 2023 (TATOLI) – Komandu Polísia Nasionál Timor-Leste (PNTL) Munisípiu Dili, liuhosi Eskuadra Dom Aleixo, detein ona joven na’in haat ne’ebé envolve iha krime públiku no kria instabilidade iha Aldeia Mane Mesak, Suku Manleuana, Postu-Administrativu Dom-Aleixo.
“Akontesementu ne’e deskonfia Grupu Arte Marsiál (GAM) rua ne’ebé asaltu hodi tuda malu iha foho leten nian. Sira sa’e ba foho leten tuda tesik ba Bairo ne’ebé pertense ba Persaudaraan Setia Hati Terate (PSHT) nian no PSHT tuda hasoru ba IKS nian”, tenik iha komunikadu ne’ebé Agência TATOLI asesu hosi mídia Servisu Relasaun Públika Ministériu Interiór, ohin.
Hafoin hetan kontatu hosi fonte servisu sekreta, Komandante Esquadra Dom Aleixo, Inspetór Polísia, Alexandrino da Costa “Samurai”, orienta ekipa patrolla to’o sa’e ba foho leten hodi normaliza situasaun.
Bainhira ekipa sa’e ba foho leten, grupu hirak ne’e ho fatuk tuda hasoru membru PNTL sira atu ekipa patrulla Dom Aleixo halo prevensaun hodi tiru gas lakrimozéniu hodi hafahe grupu rua no konsege asegura suspeitu nain haat hamutuk ho evidensia fatuk no aitonka ne’ebé sira uza hodi perturba ordem públiku no lori kedas mai halo identifikasaun iha eskadra PNTL Dom Aleixo Comoro.
Entretantu, joven na’in-rua hosi PSHT ho identidade mak ADCM tinan 16 no HS tinan 35, ne’ebé hela iha Aldeia Mane Mesak, Suku Manleuana, Postu-Administrativu Dom-Aleixo, Munisípiu Dili, enkuantu joven IKS na’in-rua hosi bairo seluk mak hanesan GADS, tinan 26 no HEM tinan 20, sira na’in-rua nu’udar estudante universitáriu ne’ebé hela iha Aldeia Mauk, Suku Manleuana, Postu-Administrativu Dom-Aleixo.
Jornalista: Hortencio Sanchez
Editór : Zezito Silva
GAM, GAM, nu’usá lakoi taka Governo permanente grupu sira-ne’e? Sira só kontribui de’it instabilidade.